Финляндиянинг НАТОга қўшилиш ҳақидаги аризаси ратификация қилинса, мамлакат альянсга Россия билан чегарага ядро қуроли жойлаштиришга рухсат бериши мумкин. Бу ҳақда Финляндия матбуотига таяниб, Newsweek хабар берди.
Мудофаа секторидаги манбалар матбуотга маълум қилишича, Финляндия ташқи ишлар ва мудофаа вазирлари Пекка Хаависто ва Антти Кайкконен июль ойидаёқ НАТО олдидаги мажбуриятларини ўз зиммасига олган, яъни, агар Хельсинкининг аризаси қабул қилинса, улар чекловлар ёки миллий шартларни илгари суришга интилмаслигини айтган.
Нашр қайд этишича, бундай шаклдаги баёнот шуни билдирадики, НАТОнинг ядро қуроли Финляндия ҳудуди орқали ўтиши ва ҳатто у ерга жойлаштирилиши ҳам мумкин.
Айни пайтда Финляндиянинг Россия билан чегараларига ядро қуроли жойлаштирилиши эҳтимоли ҳукумат томонидан расман тасдиқланганича йўқ.
Финляндия ва Швеция НАТОга қўшилиш учун қачон ариза берган?
18 май куни Финляндия ва Швеция Украинадаги жанговар ҳаракатлар авж олган бир пайтда НАТОга қўшилиш учун ариза берган. Туркия Хельсинки ва Стокгольмни мамлакатда тақиқланган Курдистон Ишчилар партияси билан ҳамкорликда айблаб, уларнинг альянсга қўшилишга бир муддат тўсқинлик қилди.Швеция ва Финляндия НАТО блокига қўшилиши учун альянсга аъзо бўлган 30 та мамлакатнинг барчаси тегишли битимни ратификация қилиши керак.
Швеция ва Финляндиянинг НАТОга аъзо бўлишини ратификация қилиш жараёни 5 июль куни бошланган. Уларнинг НАТОга қўшилишини альянснинг 30 та аъзосидан 28 таси ратификация қилди.
Россиянинг муносабати
Россия президенти Владимир Путин Швеция ва Финляндиянинг НАТОга кириши Москва хавотирига сабаб бўлмаслигини айтган. Аммо у бундан Россияга таҳдидлар пайдо бўлган тақдирда мамлакат зудлик билан жавоб қайтаришни айтган.Аввалроқ Финляндиянинг Россия билан чегараси яқинидаги Жанубий Карелия провинциясининг Лаппеенранта шаҳри ўз аэропортига НАТО базасини жойлаштиришни таклиф қилишга тайёрлиги маълум қилинганди. Бунга жавобан Россия Давлат думаси раиси Вячеслав Володин Финляндиянинг Россия билан чегара яқинидаги шаҳарларига НАТО базаларининг жойлаштирилиши у ердаги аҳолини зарба остига қўйишини айтган.
Изоҳ (0)