“Shavkat Mirziyoyevning sa’y-harakatlari tufayli O‘zbekiston Yevropa kengashining mintaqadagi asosiy hamkoriga aylandi” — kengash rahbari

Toshkentda Yevropa kengashi delegatsiyasining yangi ofisi ochilish marosimida kengash prezidenti Sharl Mishel O‘zbekiston prezidenti bilan samarali va konstruktiv muzokaralar olib borilganini ta’kidladi. Siyosiy va iqtisodiy islohotlarni amalga oshirish, ularda ortga qaytmaslikni ta’minlashda davlat rahbarining rolini yuksak baholadi.

Sharl Mishelning so‘zlariga ko‘ra, O‘zbekiston rahbarining o‘zgarishlarni davom ettirishdagi siyosiy irodasi e’tirofga loyiq. Ta’kidlanishicha, mamlakat iqtisodiyotni rivojlantirish, inson huquqlarini hurmat qilish va demokratiyani mustahkamlash yo‘lida katta muvaffaqiyatlarga erishmoqda. “Biz inson huquqlari masalalarini muhokama qildik, O‘zbekiston prezidenti qonun ustuvorligini mustahkamlash borasidagi sa’y-harakatlarni davom ettirishga tayyorligini tasdiqladi”, — deydi kengash rahbari.

U, shuningdek, mintaqaviy hamkorlikni mustahkamlashda O‘zbekiston prezidentining rolini alohida ta’kidladi. O‘zbekiston mintaqada tinchlik va barqarorlikni mustahkamlash, mintaqalararo savdo va hamkorlikni kengaytirish bo‘yicha ko‘plab tashabbus va g‘oyalar generatori bo‘layotgani qayd etildi.

Yevropa kengashi rahbari Shavkat Mirziyoyevning sa’y-harakatlari tufayli O‘zbekiston yangi qiyofa kasb etgani, YeIning mintaqadagi yanada jozibali va asosiy hamkoriga aylanganini ta’kidladi.

O‘zaro hamkorlikni kengaytirish, kengaytirilgan sheriklik va hamkorlik to‘g‘risidagi bitimni imkon qadar tezroq imzolash bo‘yicha aniq kelishuvlarga erishildi. Uning so‘zlariga ko‘ra, noyabr oyida O‘zbekistonda “Yevropa Ittifoqi—Markaziy Osiyo” o‘rtasida aloqa bo‘yicha muhim konferensiya bo‘lib o‘tadi. Bu mintaqalararo hamkorlikning bugungi holatini muhokama qilish va umumiy manfaatdor barcha masalalar bo‘yicha aniq takliflar ishlab chiqish uchun muhim maydon bo‘ladi.

Yevropa kengashi prezidentining ta’kidlashicha, muzokaralar chog‘ida Afg‘onistondagi vaziyatni tinch yo‘l bilan tartibga solish va Ukrainadagi urushning salbiy ta’siri masalalari ham muhokama qilingan. Sharl Mishel so‘zining yakunida “Yevropa kengashining Toshkentdagi delegatsiyasi ikki tomonlama hamkorlikni mustahkamlash va men bilan O‘zbekiston prezidenti o‘rtasida erishilgan kelishuvlarni amalga oshirishda muhim rol o‘ynashi kerak”, — deb ta’kidladi.