Jahon sog‘liqni saqlash tashkilotining so‘nggi hisobotiga ko‘ra, dunyoda sil kasalligining dorilarga chidamli turi ko‘payishi kuzatilmoqda. Xususan, 2021-yilda kasallikka chalinish holatlari 4,5 foizga oshdi.
O‘tgan yili Yer yuzida 10,6 million nafarga yaqin kishi ushbu xastalikka chalingan. Bu 2020-yilgi ko‘rsatkichlarga nisbatan 4,5 foizga ko‘p. Tuberkulyoz oqibatida 1,6 million nafar bemor hayotdan ko‘z yumgan.
Xalqaro ekspertlar fikricha, o‘sish tendensiyasi pandemiya oqibatlari bilan bog‘liq bo‘lishi mumkin. Ya’ni COVID-19 avj olgan davrda aksariyat mamlakatlarda sil kasalligini aniqlash va davolashga ixtisoslashgan tibbiyot muassasalari koronavirus muolajasi bilan band bo‘lgan.
Oqibatda ko‘p yillardan beri kuzatilmagan holat — tuberkulyozni yuqtirganlar soni oshishi qayd etildi. Jumladan, 2021-yilda sil xastaligining rifampitsin preparatiga chidamli turi 450 ming nafar bemorda aniqlandi. Bu ham 3 foizlik o‘sish ko‘rsatkichidir.
Tuberkulyoz erta bosqichda aniqlanmasa, bemor yil davomida 10—15 kishiga bu xavfli infeksiyani yuqtirishi mumkin. Shu sababli JSST 2035-yilgacha tuberkulyozdan o‘lim ko‘rsatkichlarini 95 foizga kamaytirishga doir strategik maqsadni qabul qilgan.
Mavzuga doir:
Izoh (0)