“Daryo” internet-nashri hamda Toshkent shahri hokimligi qoshidagi Jamoatchilik kengashi hamkorligida tashkil etilgan “Mahalla. Muammo. Mulohaza” loyihasining 4-soni mehmoni mustaqil jurnalist, publitsist, bloger Nozim Safari bo‘ldi. Ko‘rsatuvning bu galgi mavzusi — Toshkentning non oqizadigan ariqlari qani?
Nozim Safari qonunchilikdagi qurilish hujjatlariga yangi normalar kiritish taklifini ilgari surdi. Bu har bir quruvchiga qonuniy mas’uliyat berib qo‘yadi, javobgarligi bo‘ladi. Shu orqali natijaga erishish mumkin.
“Hozir shaharda ba’zi o‘rinlarda tartibsiz qurilish ishlari ketyapti. Toshkent 1966-yildagi zilziladan keyin loyihalashtirilganini inobatga olsak, shahar infrastrukturasi buncha qurilishlar, buncha aholiga, ko‘plab avtomobillarga mo‘ljallanmagan. Lekin yangi qurilayotgan uylarning aksariyati baribir eski kanalizatsion yo‘llarga ulanyapti. Buning oqibatida bosim borgan sari oshmoqda.
Toshkent shahrining bosh rejasi tayyor bo‘lgandan keyin alohida ilmiy kengash chaqirtirib, shahar infratuzilmasi bo‘yicha ishlanmasa bo‘lmaydi. Chunki rivojlanayotgan davlatlarning chetdan ko‘rinadigan yagona narsasi bu — qurilishlar. Davlatda qurilish bo‘lyaptimi, demak u rivojlanyapti. Bizning iqtisodiyotimiz ham yiliga 5—6 foiz o‘sayotgan bo‘lsa, demak qurilishlar buyog‘iga yana ham ko‘p bo‘ladi. Bu orqali shaharga ko‘proq yer kerak bo‘ladi. Agar mana bunday tartibsizlik davom etadigan bo‘lsa, yaqin 10 yilliklarda Bangladesh shahri ahvoliga kelib qolishimiz mumkin.
Shu uchun hozir biz ham orqaga qarab, ham kelajakni o‘ylab loyihalashtirishimiz kerak shaharni”, — deydi jurnalist.
Ko‘rsatuvni to‘liq tarzda “Daryo”ning YouTube’dagi sahifasi orqali tomosha qilish mumkin.
Izoh (0)