“O‘zbekistonni Putin rejimiga sherik qilib ko‘rsatganingiz uchun uzr so‘rashingiz kerak” — faollar Dmitriy Gordonga keskin munosabat bildirdi

Ijtimoiy tarmoqlarda ukrainalik jurnalist Dmitriy Gordon isroillik milliarder Leonid Nevzlin bilan uyushtirgan intervyusida Rossiya tomonidan Ukraina bilan urushda qo‘llanilayotgan uchuvchisiz dronlar Eron, Iroq va O‘zbekistonda yig‘ilayotgani haqida gapirgani muhokamalarga sabab bo‘ldi. O‘zbekiston Tashqi ishlar vazirligi bu xabar asossiz ekanini ma’lum qildi.

Ko‘plab faollar ko‘rsatuvdagi iddaolarga norozilik bildirmoqda. Jumladan, huquqshunos Hamid Sodiq Gordon gaplarini asoslay olmasa, o‘zbek xalqidan uzr so‘rashi kerakligini talab qildi.

Dmitriy Ilich, O‘zbekiston bu Eron ham, Iroq ham, Suriya ham emas. O‘zbekiston — rus bosqinining tarafdori emas va buni doimo e’tirof etib keladi. O‘zbekistonda Eronning uchuvchisiz harbiy qurilmalari ishlab chiqariladimi yoki yo‘qmi, buni aniqlashning yo‘llari ko‘p. Istalgan ma’lumotga elchixona yoki boshqa ko‘plab manbalar yordamida oydinlik kiritish mumkin.

Putin rejimi uchun uchuvchisiz harbiy qurilmalar ishlab chiqarish va yetkazib berish hozirgi davrda yashirib bo‘lmaydigan ish. Qilinayotgan da’vo o‘zbek xalqi uchun og‘ir ayblov hisoblanadi. Siz kabi tajribali jurnalist bu jihatlarini ham inobatga olishingiz kerak edi. Agar ko‘rsatuvingizdagi iddaolaringizga asos keltira olmasangiz, O‘zbekistonni Putin rejimiga sherik qilib ko‘rsatganingiz uchun uzr so‘rashingiz kerak.

Eng keng tarqalgan versiyaga ko‘ra, Gordon O‘zbekistonni qo‘shni Tojikiston bilan almashtirib yuborgan bo‘lishi mumkin ekan. Lekin bu kabi jiddiy fikrlar bildirishda, jurnalistlar, siyosatchilar o‘ta mas’uliyatli bo‘lishlari kerak. Hammaning ham xato qilish huquqi bor. Masalan, men ham xato qilib, Gordonni familiyasidagi uchinchi harfini “n”ga almashtirsam, yoqarmidi?! Albatta, yo‘q. Mas’uliyatli bo‘lish kerak, yaxshi emas, – deb yozadi u.

Bu asossiz va mas’uliyatsiz e’lonni e’tiborsiz qoldirmaslik kerak. O‘zbekiston rus agressiyasini hech qanday shaklda qo‘llab-quvvatlamasligini, muzokaralar va hududiy yaxlitlikni qo‘llab-quvvatlaydigan betaraf pozitsiyasini fuqarolarimiz ham butun dunyo ham juda yaxshi tushunib bo‘ldi. Tashqi ishlar va Mudofaa vazirliklari bu tuhmatni rasman rad etishi va Gordonni uzr so‘rashga majbur qilishi kerak, – deb yozgandi u.