Ижтимоий тармоқларда украиналик журналист Дмитрий Гордон исроиллик миллиардер Леонид Невзлин билан уюштирган интервьюсида Россия томонидан Украина билан урушда қўлланилаётган учувчисиз дронлар Эрон, Ироқ ва Ўзбекистонда йиғилаётгани ҳақида гапиргани муҳокамаларга сабаб бўлди. Ўзбекистон Ташқи ишлар вазирлиги бу хабар асоссиз эканини маълум қилди.
Кўплаб фаоллар кўрсатувдаги иддаоларга норозилик билдирмоқда. Жумладан, ҳуқуқшунос Ҳамид Содиқ Гордон гапларини асослай олмаса, ўзбек халқидан узр сўраши кераклигини талаб қилди.
Дмитрий Илич, Ўзбекистон бу Эрон ҳам, Ироқ ҳам, Сурия ҳам эмас. Ўзбекистон — рус босқинининг тарафдори эмас ва буни доимо эътироф этиб келади. Ўзбекистонда Эроннинг учувчисиз ҳарбий қурилмалари ишлаб чиқариладими ёки йўқми, буни аниқлашнинг йўллари кўп. Исталган маълумотга элчихона ёки бошқа кўплаб манбалар ёрдамида ойдинлик киритиш мумкин.Сиёсатшунос Камолиддин Раббимов бундай жиддий фикрлар билдиришда мутахассислар масъулиятли бўлишлари лозимлигини ёзди.Путин режими учун учувчисиз ҳарбий қурилмалар ишлаб чиқариш ва етказиб бериш ҳозирги даврда яшириб бўлмайдиган иш. Қилинаётган даъво ўзбек халқи учун оғир айблов ҳисобланади. Сиз каби тажрибали журналист бу жиҳатларини ҳам инобатга олишингиз керак эди. Агар кўрсатувингиздаги иддаоларингизга асос келтира олмасангиз, Ўзбекистонни Путин режимига шерик қилиб кўрсатганингиз учун узр сўрашингиз керак.
Энг кенг тарқалган версияга кўра, Гордон Ўзбекистонни қўшни Тожикистон билан алмаштириб юборган бўлиши мумкин экан. Лекин бу каби жиддий фикрлар билдиришда, журналистлар, сиёсатчилар ўта масъулиятли бўлишлари керак. Ҳамманинг ҳам хато қилиш ҳуқуқи бор. Масалан, мен ҳам хато қилиб, Гордонни фамилиясидаги учинчи ҳарфини «н»га алмаштирсам, ёқармиди?! Албатта, йўқ. Масъулиятли бўлиш керак, яхши эмас, – деб ёзади у.Аввалроқ депутат Алишер Қодиров Ташқи ишлар ва Мудофаа вазирликлари бу туҳматни расман рад этиши кераклиги ҳақида фикр билдирганди.
Бу асоссиз ва масъулиятсиз эълонни эътиборсиз қолдирмаслик керак. Ўзбекистон рус агрессиясини ҳеч қандай шаклда қўллаб-қувватламаслигини, музокаралар ва ҳудудий яхлитликни қўллаб-қувватлайдиган бетараф позициясини фуқароларимиз ҳам бутун дунё ҳам жуда яхши тушуниб бўлди. Ташқи ишлар ва Мудофаа вазирликлари бу туҳматни расман рад этиши ва Гордонни узр сўрашга мажбур қилиши керак, – деб ёзганди у.
Изоҳ (0)