Rossiyaning Orlov viloyatidagi chiqindilarni qayta ishlash korxonasida ishlayotgan O‘zbekiston fuqarolari safarbarlik uchun chaqiruv qog‘ozi olgandi. O‘zbekistonning Rossiyadagi elchixonasi holat yuzasidan ma’lumot berdi.
Qayd etilishicha, “Ekositi” chiqindilarni qayta ishlash zavodida mehnat faoliyati bilan shug‘ullanuvchi O‘zbekiston fuqarolarining murojaati ommaviy axborot vositalarida tarqalishi munosabati bilan elchixona xodimlari kompaniya bosh direktori Yuriy Paraxin, uning o‘rinbosari Valeriy Okorovkov va respublika fuqarolari bilan bog‘landi.
26 nafar O‘zbekiston fuqarosiga safarbarlik chaqiruvi texnik xato tufayli yuborilgan va hujjatlar harbiy komissariyatda tekshirilgandan so‘ng chaqiruv qog‘ozi qaytarib olinib, masala hal etilgan. Bu ma’lumotni korxona rahbariyati va respublika fuqarolari tasdiqladi.
Elchixona qisman safarbarlik e’lon qilingani munosabati bilan O‘zbekiston fuqarolari tomonidan texnik xatolar bo‘yicha chaqiruv qog‘ozlari olish holatlari mavjudligi ham ma’lum qilgan. Ta’kidlanishicha, odatda barcha bunday hollarda safarbarlik chaqiruvi hujjatlar tekshirilgandan so‘ng qaytarib olinadi.
“Shu munosabat bilan, shunga o‘xshash vaziyatlarda O‘zbekistonning joylardagi bosh konsulligi (Vladivostok, Novosibirsk, Qozon, Yekaterinburg, Sankt-Peterburg, Rostov-na-Donu) yoki O‘zbekiston elchixonasining Moskvadagi konsullik bo‘limiga murojaat qilishni tavsiya etilamiz yoki harbiy komissarlik vakillariga amaldagi shaxsni tasdiqlovchi hujjat bilan mustaqil ravishda murojaat qiling”, — deyiladi xabarda.
Ayni paytda holat O‘zbekistonning Moskvadagi elchixonasi va Tashqi mehnat migratsiyasi agentligining Rossiyadagi vakolatxonasi vakillaridan iborat ishchi guruh tomonidan nazoratga olingan va tashkilot rahbariyati hamda fuqarolar bilan aloqa o‘rnatilib, voqea joyiga yo‘l olgan.
Mavzuga doir: Rossiya armiyasiga chaqirishsa, migrantlar qanday yo‘l tutishi kerak?
Izoh (0)