O‘zbekistondagi mavjud maktablarning 7111 tasi ko‘mir yoqilg‘isi yordamida isitilishi ma’lum bo‘ldi

O‘zbekistondagi mavjud maktablarning 7111 tasi ko‘mir yoqilg‘isi yordamida isitiladi. Bu haqda bugun Xalq ta’limi vaziri Baxtiyor Saidov tomonidan videokonferensaloqa orqali hududiy xalq ta’limi boshqarmalari rahbarlari ishtirokida o‘tkazilgan yig‘ilishda aytilgan.

Mazkur yig‘ilish haqida “Daryo”ga batafsil ma’lumot bergan vazirlik axborot xizmati rahbari Laylo Rustamovaning xabar berishicha, vazir videokonferensaloqa orqali hududiy xalq ta’limi boshqarmalari rahbarlari bilan muloqot o‘tkazib, ta’lim sifati va mazmuni, o‘quv muassasalarida kuz-qish mavsumiga tayyorgarlik, rahbarlar mas’uliyati, fuqarolarning murojaatlari bilan ishlash masalalarini muhokama qilgan.

Yig‘ilishda ta’kidlanishicha, mamlakatimizdagi mavjud 10 104 ta umumta’lim maktabining 7 111 tasi ko‘mir yoqilg‘isi yordamida, qolganlari tabiiy gaz, suyuq yoqilg‘i hamda elektr energiyasi bilan isitiladi. Hozirda ko‘mir yoqilg‘isi bilan isitiladigan maktablarga to‘liq ravishda ko‘mir mahsulotlari yetkazib berilgan. Ammo tegishli tashkilotlar bilan hamkorlikda joylardagi qator maktablarda o‘tkazilgan o‘rganishlar davomida ko‘mir mahsulotlarini saqlash, isitish qozonlarining yaroqlilik holati talab darajasida emasligi tanqid ostiga olindi, — deydi Laylo Rustamova.

Qo‘shimcha qilinishicha, tabiiy gaz, ko‘mir, suyuq yoqilg‘i hamda elektr energiyasi yordamida isitiladigan maktablarning isitish tizimini qaytadan tahlil qilib chiqish bo‘yicha boshqarmalar qoshida maxsus shtablar, soha xodimlari va fuqarolarning bu boradagi murojaatlarini qabul qilishga mo‘ljallangan Call-markazlar tashkil etilishi rejalashtirilgan.

Xabaringiz bor, 2022-yil 10-iyun kuni prezidentimiz rahbarligida o‘tkazilgan videoselektor yig‘ilishida belgilangan vazifalar ijrosini ta’minlash maqsadida umumta’lim maktablarga quyosh elektr panellarini o‘rnatish ishlari olib borilmoqda. Mazkur tashabbus natijasida maktablarning elektr energiyasi sarfini sezilarli darajada kamaytirishi va maktab binolarini uzluksiz elektr energiya bilan ta’minlashda katta xizmati qilishi aytib o‘tildi, — deydi vazirlik mas’uli.