“Belarusning bozordagi narxlarni oshirishni taqiqlash siyosatiga salbiy munosabatdamiz” — Mamarizo Nurmurodov

O‘zbekiston Belarusning bozordagi narxlarni oshirishni taqiqlash siyosatiga salbiy munosabatda. Bu haqda Markaziy bank raisi Mamarizo Nurmurodov 27-oktabr kuni bo‘lib o‘tgan matbuot anjumanida ma’lum qildi, deya xabar bermoqda “Daryo” muxbiri.

Yaqinda Belarus hukumati mamlakat bozoridagi har qanday narxlarni oshirishni taqiqlagandi. Matbuot anjumanida Markaziy bankning bunday siyosatga munosabati va iqtisodiy vaziyat yomonlashsa, O‘zbekiston ham shunday yo‘l tutishi qanday oqibatlarga olib kelishi haqida so‘raldi.

Mamarizo Nurmurodovning ta’kidlashicha, O‘zbekistonda narx-navo boshqarilmaydi.

Belarusning narxlarni oshirmaslik siyosatiga munosabatimiz salbiy. Bunday yo‘l bilan hech narsaga erishib bo‘lmaydi. Prezidentimiz Markaziy bankka rahbar bo‘layotganimda: “bizga boshqariladigan narx-navo kerak emas, bozor belgilasin. Bozordagi narx mo‘tadil bo‘lishiga Markaziy bank qo‘lidan nima kelsa, ta’minlashingiz kerak”, degandilar. Shu paytgacha mazkur vazifani bajaryapmiz. Iqtisodiy vaziyat yomonlashgan taqdirda ham Markaziy bankning qarashlari va fikri unaqa usuldan bormaydi.

Mamarizo Nurmurodov, Markaziy bank raisi.