Xalq deputatlari Asaka tuman kengashi qarori bilan noqonuniy ravishda tuman hokimligi zaxirasiga olib qo‘yilgan 260 gektar yer fermerlarga qaytarildi. Bu haqda “Daryo” muxbiri Umidjon Mamarasulov xabar bermoqda.
Aniqlanishicha, Xalq deputatlari Asaka tuman kengashining 2022-yil 13-sentabrdagi qarori bilan tumandagi 102 ta fermer xo‘jaligining 191 gektar yer maydonlari qisman, hamda tuman hokimligi zaxirasida turgan 69 gektar yer maydoni zaxiraga olingan. Bunga fermerlarning yerlarini qisman zaxiraga qaytarish to‘g‘risidagi arizalari, prezidentning 2021-yil 23-noyabrdagi “Meva-sabzavotchilik va uzumchilikda tadbirkorlikni rivojlantirish, qishloq xo‘jaligi ishlab chiqarishida dehqon xo‘jaliklarining ulushini oshirish chora-tadbirlari to‘g‘risida”gi hamda Vazirlar Mahkamasining 2021-yil 24-noyabrdagi “Qishloq xo‘jaligiga mo‘ljallangan yer uchastkalarini ijaraga berish tartibiga doir normativ-huquqiy hujjatlarni tasdiqlash to‘g‘risida”gi qarorlari asos qilib ko‘rsatilgan.
Asaka tuman adliya bo‘limi tomonidan “e-qaror” elektron tizimi orqali qabul qilingan qarorlar monitoring tartibida o‘rganilganida kengashning ushbu qarori prezidentning 2022-yil 24-avgustdagi “Mulk huquqining daxlsizligini ishonchli himoya qilish, mulkiy munosabatlarga asossiz aralashuvga yo‘l qo‘ymaslik, xususiy mulkning kapitallashuv darajasini oshirish chora-tadbirlari to‘g‘risida”gi farmoniga zid ekanligi aniqlangan.
Aniqlangan qonun buzilish holatlarini bartaraf etish maqsadida Asaka tuman adliya bo‘limi tomonidan yuqoridagi farmonga zid bo‘lgan qarorni bekor qilishlik yuzasidan taqdimnoma kiritilgan. Taqdimnomaga asosan qaror kengashning 2022-yil 21-oktabrdagi qaroriga asosan bekor qilinib, fermerlarning yerlari o‘zlariga qaytarildi.
Izoh (0)