Халқ депутатлари Асака туман кенгаши қарори билан ноқонуний равишда туман ҳокимлиги захирасига олиб қўйилган 260 гектар ер фермерларга қайтарилди. Бу ҳақда «Дарё» мухбири Умиджон Мамарасулов хабар бермоқда.
Аниқланишича, Халқ депутатлари Асака туман кенгашининг 2022 йил 13 сентябрдаги қарори билан тумандаги 102 та фермер хўжалигининг 191 гектар ер майдонлари қисман, ҳамда туман ҳокимлиги захирасида турган 69 гектар ер майдони захирага олинган. Бунга фермерларнинг ерларини қисман захирага қайтариш тўғрисидаги аризалари, президентнинг 2021 йил 23 ноябрдаги «Мева-сабзавотчилик ва узумчиликда тадбиркорликни ривожлантириш, қишлоқ хўжалиги ишлаб чиқаришида деҳқон хўжаликларининг улушини ошириш чора-тадбирлари тўғрисида»ги ҳамда Вазирлар Маҳкамасининг 2021 йил 24 ноябрдаги «Қишлоқ хўжалигига мўлжалланган ер участкаларини ижарага бериш тартибига доир норматив-ҳуқуқий ҳужжатларни тасдиқлаш тўғрисида»ги қарорлари асос қилиб кўрсатилган.
Асака туман адлия бўлими томонидан «e-qaror» электрон тизими орқали қабул қилинган қарорлар мониторинг тартибида ўрганилганида кенгашнинг ушбу қарори президентнинг 2022 йил 24 августдаги «Мулк ҳуқуқининг дахлсизлигини ишончли ҳимоя қилиш, мулкий муносабатларга асоссиз аралашувга йўл қўймаслик, хусусий мулкнинг капиталлашув даражасини ошириш чора-тадбирлари тўғрисида»ги фармонига зид эканлиги аниқланган.
Аниқланган қонун бузилиш ҳолатларини бартараф этиш мақсадида Асака туман адлия бўлими томонидан юқоридаги фармонга зид бўлган қарорни бекор қилишлик юзасидан тақдимнома киритилган. Тақдимномага асосан қарор кенгашнинг 2022 йил 21 октябрдаги қарорига асосан бекор қилиниб, фермерларнинг ерлари ўзларига қайтарилди.
Изоҳ (0)