Checheniston rahbari Ramzan Qodirov yana Ukrainadagi “maxsus harbiy operatsiya”ning borishini tanqid qildi va Ukraina shaharlariga kuchliroq zarba berishga chaqirdi. Bu haqda 24-oktabr, dushanba kuni u o‘zining Telegram-kanalida audio qoldirdi.
“Rossiya Ukraina tomonidan Rossiyaning yangi hududlari o‘qqa tutilishiga kuchsiz javob qaytarmoqda”, — dedi u.
Qodirovning fikricha ukrainaliklar “Rossiya yo‘nalishida” o‘q uzishni xayoliga ham keltirmasligini tushunishi uchun qattiqroq choralar ko‘rish zarur. Uning so‘zlariga ko‘ra, jangovar harakatlar allaqachon “Rossiya hududida” olib borilmoqda.
Qodirov hozirgi vaziyatdan juda norozi ekanini, biroq uning fikricha, “bundan yomonrog‘i” bo‘lmasligini ta’kidladi.
Sentabr oyi oxirida Rossiya prezidenti Vladimir Putin Donetsk va Lugansk xalq respublikalari, Zaporojye va Xerson viloyatlarini anneksiya qilish haqidagi farmonni imzolagan edi. Undan avval ushbu hududlarning Rossiya qo‘shinlari tomonidan bosib olingan qismida referendumlar o‘tkazilgan, uning natijalari Ukraina va G‘arb davlatlari tomonidan tan olinmagan. Oktabr oyi o‘rtalarida Putin bu hududlarda harbiy holat joriy qildi.
Izoh (0)