Чеченистон раҳбари Рамзан Қодиров яна Украинадаги «махсус ҳарбий операция»нинг боришини танқид қилди ва Украина шаҳарларига кучлироқ зарба беришга чақирди. Бу ҳақда 24 октябрь, душанба куни у ўзининг Telegram-каналида аудио қолдирди.
«Россия Украина томонидан Россиянинг янги ҳудудлари ўққа тутилишига кучсиз жавоб қайтармоқда», — деди у.
Қодировнинг фикрича украиналиклар «Россия йўналишида» ўқ узишни хаёлига ҳам келтирмаслигини тушуниши учун қаттиқроқ чоралар кўриш зарур. Унинг сўзларига кўра, жанговар ҳаракатлар аллақачон «Россия ҳудудида» олиб борилмоқда.
Қодиров ҳозирги вазиятдан жуда норози эканини, бироқ унинг фикрича, «бундан ёмонроғи» бўлмаслигини таъкидлади.
Сентябрь ойи охирида Россия президенти Владимир Путин Донецк ва Луганск халқ республикалари, Запорожье ва Херсон вилоятларини аннексия қилиш ҳақидаги фармонни имзолаган эди. Ундан аввал ушбу ҳудудларнинг Россия қўшинлари томонидан босиб олинган қисмида референдумлар ўтказилган, унинг натижалари Украина ва Ғарб давлатлари томонидан тан олинмаган. Октябрь ойи ўрталарида Путин бу ҳудудларда ҳарбий ҳолат жорий қилди.
Изоҳ (0)