Қозоғистон президенти Қосим-Жўмарт Тўқаев республика Ҳарбий доктринасига ўзгартиришлар киритиш тўғрисидаги фармонни имзолади. Бу ҳақда мамлакат Мудофаа вазирлиги хабар берди.
«Ҳужжатга ҳарбий-сиёсий ва ҳарбий-стратегик соҳалардаги фаолиятнинг янги йўналишлари, ҳарбий соҳадаги норматив-ҳуқуқий ҳужжатларни тизимлаштириш ва ҳарбий режалаштириш тизимини жорий қилиш бўйича чора-тадбирлар киритилди», — дейилади хабарда.
Бундан ташқари, янгиланган доктрина Махсус операциялар бўлинмаларини ривожлантириш ва уларнинг бошқа давлат органлари махсус топшириқли бўлинмалари билан ўзаро ҳамкорлигини кенгайтиришни кўзда тутади.
Ҳарбий доктринанинг янги таҳрири давлатнинг ҳарбий хавфсизлик ва мудофаани таъминлаш бўйича қарашларини замонавий талаблар ва шароитларга мослаштириш имконини беради, шунингдек, мамлакатнинг янги таҳдидлар ва хавфларга мувофиқ жавоб кўрсатиш бўйича салоҳиятини оширади, дея қайд этди Мудофаа вазирлиги. Ҳужжатнинг ўзи 12 октябрдаёқ эълон қилинганди.
У, шу жумладан, ахборот-психологик ва дастурий-техник (кибер) таъсирларга қарши кураш учун бўлинма тузишни назарда тутади, шунингдек, Қуролли кучлар таркибида ҳудуди мудофаа бошқаруви органини тузади.
Доктринада таъкидланишича, Қозоғистон ҳеч бир давлатни душман деб ҳисобламайди. Жорий вазият таҳлилига бағишланган бўлимда айтилишича, жаҳондаги ҳарбий-сиёсий муҳит тараққиётнинг юқори динамиклиги ва кутилмаган натижалари, дунё ва минтақа давлатлари ўртасида таъсир соҳалари учун курашнинг кучайиши, шунингдек, давлатлараро ва давлат ичидаги зиддиятларни ҳал қилишда ҳарбий куч ролининг ўсиши билан тавсифланади.
Қозоғистон хавфсизлиги учун асосий таҳдидлар орасида «дунёда оммавий қирғин қуроли ҳажмининг ошиши, шунингдек, янги физик тамойиллар асосига қурилган оммавий таъсир қуролининг яратилиши» тилга олинган. Республиканинг ҳарбий-сиёсий соҳадаги фаолиятининг асосий йўналишлари ҳақидаги банд эса «глобал ва минтақавий хавфсизлик тизимларини такомиллаштириш мақсадларида бошқа давлатлар ва халқаро ташкилотлар билан ҳамкорликни мустаҳкамлаш» ҳақидаги низом билан тўлдирилган.
Бундан ташқари, янгиланган ҳужжатда Қозоғистоннинг тинчликпарварлик фаолияти билан боғлиқ чора-тадбирлар рўйхати кенгайтирилган.
Изоҳ (0)