Qirg‘izistonning “Ail bank”i bankomatlar va POS terminallarda Rossiyaning MIR kartalariga xizmat ko‘rsatishni to‘xtatdi. Bu haqda bank matbuot xizmati xabar berdi.
“Milliy to‘lov kartalari tizimi” (NSPK, MIR karta operatori) doirasida “Ail bank” tomonidan chiqarilgan kartalarga mijozdan mijozga pul o‘tkazmalarini amalga oshirish to‘xtatildi. Bank buni texnik sabablar bilan izohladi.
“Ail bank” 1996-yilda mamlakat hukumati tomonidan Qirg‘iziston qishloq xo‘jaligi moliya korporatsiyasi sifatida tashkil etilgan.
Oktabr oyida Qirg‘izistonning sakkiz banki Rossiyaning MIR kartalariga xizmat ko‘rsatishni to‘xtatganini e’lon qildi.
Qirg‘izistonning ikki banki — “Bakai Bank” va “Doskredobank” 17-oktabrdan beri MIR kartalariga xizmat ko‘rsatmayapti.
Avvalroq xuddi shunday qaror Qirg‘izistonning “Kompanion” banki tomonidan ham qabul qilingan bo‘lib, u 4-oktabrdan boshlab Rossiyaning 21 banki tomonidan chiqarilgan MIR kartalariga xizmat ko‘rsatishni to‘xtatgan edi.
Keyinchalik, bunday chora haqida “Dos-Kredobank”, “Bakai Bank”, “Qirg‘iziston”, “Halyk Bank”, “Bank of Asia”, “Demir Bank” xabar berdi.
Avvalroq O‘zbekistonda ham MIR kartalariga xizmat ko‘rsatish to‘xtatilgan edi. AQSH MIR kartalari tufayli xorijiy banklar uchun sanksiyalar xavfini e’lon qilgan.
Buning ortidan Turkiyaning ikkita yirik banki MIR kartalari bilan operatsiyalarni to‘xtatgan edi. Keyinchalik Qozog‘iston va Vyetnam banklari ham MIR kartalariga xizmat ko‘rsatmasligini ma’lum qilgan.
Izoh (0)