Қирғизистоннинг «Аил банк»и банкоматлар ва POS терминалларда Россиянинг МИР карталарига хизмат кўрсатишни тўхтатди. Бу ҳақда банк матбуот хизмати хабар берди.
«Миллий тўлов карталари тизими» (NSPK, МИР карта оператори) доирасида «Аил банк» томонидан чиқарилган карталарга мижоздан мижозга пул ўтказмаларини амалга ошириш тўхтатилди. Банк буни техник сабаблар билан изоҳлади.
«Аил банк» 1996 йилда мамлакат ҳукумати томонидан Қирғизистон қишлоқ хўжалиги молия корпорацияси сифатида ташкил этилган.
Октябрь ойида Қирғизистоннинг саккиз банки Россиянинг МИР карталарига хизмат кўрсатишни тўхтатганини эълон қилди.
Қирғизистоннинг икки банки — «Bakai Bank» ва «Doskredobank» 17 октябрдан бери МИР карталарига хизмат кўрсатмаяпти.
Аввалроқ худди шундай қарор Қирғизистоннинг «Компанион» банки томонидан ҳам қабул қилинган бўлиб, у 4 октябрдан бошлаб Россиянинг 21 банки томонидан чиқарилган МИР карталарига хизмат кўрсатишни тўхтатган эди.
Кейинчалик, бундай чора ҳақида «Дос-Кредобанк», «Bakai Bank», «Қирғизистон», «Halyk Bank», «Bank of Asia», «Демир Банк» хабар берди.
Аввалроқ Ўзбекистонда ҳам МИР карталарига хизмат кўрсатиш тўхтатилган эди. АҚШ МИР карталари туфайли хорижий банклар учун санкциялар хавфини эълон қилган.
Бунинг ортидан Туркиянинг иккита йирик банки МИР карталари билан операцияларни тўхтатган эди. Кейинчалик Қозоғистон ва Вьетнам банклари ҳам МИР карталарига хизмат кўрсатмаслигини маълум қилган.
Изоҳ (0)