22-oktabr kuni soat 04:55 da Sirdaryo viloyati Malik aholi punktidagi Mudofaa vazirligi omborida yakka tartibda portlash sodir bo‘lgandi. Ushbu hodisa oqibatida jarohat olgan 16 nafar bemorning 12 nafari Sirdaryo tumani tibbiyot birlashmasiga olib kelingan. Barcha jarohat olganlarga zudlik bilan birinchi yordam ko‘rsatilgan. Hisob-kitoblarga ko‘ra, 3742 ta turar va noturar joyning tomi, shifti, deraza va eshik romlariga qisman talafot yetgan.
“Daryo” muxbiri voqea joyida bo‘lib, reportaj tayyorladi.
Harbiy qism atrofida joylashgan mahallada istiqomat qiluvchi Ro‘zaxon Isoqovaning aytishicha, avval kuchli portlash bo‘lgan, keyin qattiq ovoz chiqqan.
“Bomdod namozini o‘qishga turgan edim. Ayvonga chiqqanimda qattiq ovoz kelib, derazaga nimadir kelib urildi. Qo‘rqqanimdan dod deb, qaltirab ketdim. Oshxonamizdagi gaz ballonni portlab ketdimikan, deb o‘yladim. Birpasdan keyin guvullagan ovoz uchib o‘tdi. Osmon qop-qora tutun, atrof chang bo‘lib ketgandi. Oynalar sinib, uyim devoriga yoriq ketdi. Haligacha o‘zimga kelolganim yo‘q. Ukrainadagilar qanday chidayapti ekan-a? U yerlarda har kuni portlash bo‘lyapti. Bizdagi bitta portlashga shunchalik bo‘lgan bo‘lsa”, — dedi Ro‘zaxon Isoqova.
Uning qo‘shimcha qilishicha, mahallaga biriktirilgan hokim yordamchisi kelib, xonadon egalaridan hol-ahvol so‘rab ketgan.
Holatga guvoh bo‘lgan yana bir fuqaro Mehri Haydarovaning aytishicha, avval atrof yorishib ketgan, keyin qattiq ovoz chiqib, gumburlagan.
“Zilzilada bo‘lgani kabi uy qimirlab ketdi. Nevaralarim qo‘rqib, dod solishdi. Oynalar singani, shiftlar ko‘chib tushganini hisobga olmasa, o‘zimizga hech qanday zarar yetgani yo‘q”, — dedi Mehri Haydarova.
Harbiy qismdan 900 metr uzoqlikda ikkita tovuq fermasi joylashgan Farhod Haydarovning aytishicha, ferma binolariga juda katta zarar yetgan.
“O‘sha harbiy qism yaqinida ikkita tovuq fermamiz bor edi. Ferma binosining shiftlari tushib, 50 ga yaqin darchasi sinib ketgan. Tomga nimadir kelib tushgan, shiferlari maydalanib, yo‘q bo‘lib ketgan. Katta ustunlariga shikast yetibdi. Kichkina teshikdan zarb kirib, eshik va romlarni 10 metr uzoqlikka otib yuborgan. Shifrlarni mixidan chiqarib tashlagan. Xuddi qoziq qoqqandek beton bo‘laklari yerga kirib ketgan”, — dedi Farhod Haydarov.
Uning qo‘shimcha qilishicha, sapyorlar guruhi atroflarni o‘rganib, bombaning qoldiqlarini terib, o‘sha yerga belgi qo‘yib ketishgan.
“Daryo” muxbiri bilan suhbatlashgan guvohlarning aytishicha, portlash ta’siri Toshkent viloyatining Chinoz va Yangiyo‘l tumanigacha yetib kelgan.
Hozirda portlash radiusi qancha bo‘lgani va uning aniq sabablari aytilganicha yo‘q.
Yangiyer shahar hokimi Otabek Nosirovning ma’lum qilishicha, respublika va viloyat mutasaddilari tomonidan tezkor ishchi guruhlari tuzilib, har bir mahalla kesimida yetkazilgan zarar o‘rganib chiqilgan.
“Yetkazilgan zarar jadval asosida o‘rganib chiqildi. Shunga muvofiq aholiga oyna va rom, shifer mahsulotlari yetkazib berilmoqda”, — dedi Otabek Nosirov.
Sirdaryo viloyati hokimligi bergan ma’lumotga ko‘ra, portlashdan zarar ko‘rgan turar va noturar joy binolarga 10 ming kvadrat oyna va 4,5 ming listdan ortiq shifer yetkazib berilgan.
Mudofaa vazirligining bildirishicha, ayni vaqtda hududga jalb etilgan harbiy xizmatchilar tomonidan harbiy qism atrofidagi ayrim mahallalarning shikast yetgan xonadonlari ko‘zdan kechirilib, uy egalariga yordam ko‘rsatilyapti.
“Xonadonlarning oynalari yangilanmoqda, tom qismiga zarar yetgan obyektlar ta’mirlanyapti. Hosil bo‘lgan chiqindilar to‘liq tozalanyapti. Harbiy qism hududida joylashgan harbiy shaharchada ham ayrim xonadonlarning singan oynalari va eshiklari ta’mirlanmoqda”, — deyiladi vazirlik axborotida.
Izoh (0)