Yer yuzi aholisi 25-oktabr, seshanba kuni astronomik hodisalardan biri — Quyosh tutilishini kuzatishi mumkin.
O‘zbekiston Fanlar akademiyasi matbuot xizmatining xabar berishicha, ushbu tutilish qisman Quyosh tutilishi hisoblanib, tutilishning to‘liq fazasida Quyosh yuzasining deyarli 82 foizini to‘sadi. Quyosh tutilishining umumiy davomiyligi 4 soatdan ortiqroq bo‘lib, O‘zbekistonda uning 2 soatdan ziyodroq qismi kuzatiladi.
Ushbu astronomik hodisani Islandiya va Grenlandiya oroli, Afrikaning shimoli-sharqiy qismi, Yevropa, Yaqin Sharq, G‘arbiy Sibir va O‘rta Osiyo mamlakatlari aholisi kuzatishi mumkin.
O‘zbekistonning hamma hududida qisman Quyosh tutilishi deyarli bir xil katta fazada kuzatiladi. Quyosh tutilishi Toshkent vaqti bilan 15:23 da boshlanib, maksimal fazasi 16:34 ga to‘g‘ri keladi, soat 17:38 da Quyosh tutilishi yakunlanadi.
“O‘zgidromet” mutaxassisi Erkin Abdulahatovning yozishicha, mazkur hodisani 23—26-oktabr kunlari respublikaga kirib kelishi kutilayotgan nam havo oqimlari so‘nggi bosqichlaridan biri sabab respublika aholisi kuzata olmasligi mumkin.
Chunki 25-oktabr tushdan so‘ng 14:00 dan 16:00 oralig‘ida respublika osmonini bulut qoplaydi. Faqat Qizilqum cho‘llari g‘arbiy va Toshkent viloyati ba’zi qismlari bundan mustasno.
Ma’lumot uchun, qisman Quyosh tutilishi deb Quyosh yuzasining ma’lum bir qismi Oy tomonidan to‘silishi holatiga aytiladi. Quyosh tutilishining qisman bo‘lishi Oy va Quyosh markazlarining ustma-ust tushmasdan to‘silishi bilan izohlanadi.
Izoh (0)