Andijon viloyati Shahrixon tumanida 23-oktabr kuni uchta transport vositasi ishtirokida yo‘l-transport hodisasi sodir bo‘ldi. Bu haqda Favqulodda vaziyatlar vazirligi xabar berdi.
Ma’lum qilinishicha, bugun, 23-oktabr kuni soat 17:30 larda Andijon viloyati Shahrixon tumani “Qo‘rg‘oncha” MFY hududidan o‘tgan, A-373 Toshkent—O‘sh xalqaro avtomobil yo‘lining 402-kilometrida Spark va Cobalt rusumli avtomobillar bir-biri bilan to‘qnashishi natijasida yo‘l-transport hodisasi sodir bo‘lgan.
Oqibatda Cobalt rusumli avtomobil haydovchisi boshqaruvni yo‘qotib, yo‘l o‘rtasidagi beton to‘siqqa urilgan va yo‘lning qarama-qarshi tomoniga o‘tib ketgan hamda qarama-qarshi tomondan harakatlanib kelayotgan boshqa bir Cobalt rusumli avtomobilga borib urilgan.
Natijada kelib urilgan Cobalt rusumli avtomobilning dvigatel qismida qisqa tutashuv sodir bo‘lib, avtomashinada yong‘in kelib chiqqan.
YTH natijasida kelib urilgan Cobalt rusumli avtomobil yo‘lovchisi turli darajada tan jarohatlari olib, tuman SHTTYoBga yuborilgan.
Hodisa oqibatida halok bo‘lganlar to‘g‘risida ma’lumot kelib tushmagan.
Izoh (0)