Marg‘ilon shahrida “Atlas bayrami” V xalqaro an’anaviy to‘qimachilik festivali bo‘lib o‘tdi. Bu haqda “Daryo” muxbiri Azizjon Ermatov xabar bermoqda.
Festival Turizm va madaniy meros vazirligi, Farg‘ona viloyati hokimligi, YUNESKOning O‘zbekistondagi vakolatxonasi va “Hunarmand” uyushmasi tashabbusi bilan o‘tkazildi.
Xalqaro miqyosda o‘tkazilgan festivalda Qozog‘iston, Qirg‘iziston, Tojikiston, Malayziya, Hindiston, Turkiya, Tailand, Bangladesh, Indoneziya, AQSH, Mo‘g‘uliston, Italiya kabi 20 dan ziyod mamlakatdan kelgan hunarmandlar, madaniyat arboblari, san’atshunos olimlar, dizaynerlar, rassomlar, soha mutaxassislari ishtirok etdi.
Mazkur festivaldan oldin O‘zbekiston va Qirg‘iziston hunarmandlari hamda dizaynerlari uchun taniqli ustalar ishtirokida an’anaviy hunarmandchilik, liboslar dizayni bo‘yicha mahorat darslari tashkillandi.
Festivalning tantanali ochilish marosimida Farg‘ona viloyati hokimi Xayrullo Bozorov, Butunjahon hunarmandlar kengashi prezidenti Saad al-Kaddumiy ishtirok etdi.
Butunjahon hunarmandlar kengashi tomonidan Marg‘ilon shahriga “Jahon ipak va ikat hunarmandlari shahri” maqomi berildi. Bugungi kunda dunyoning 4 ta qit’asidan 57 ta shahar bunday e’tirofga sazovor bo‘lgan. Viloyatda Qo‘qon shahridan so‘ng Marg‘ilon ham ushbu ro‘yxatga kiritildi.
O‘zbek milliy hunarmandchiligining markazi bo‘lgan Farg‘ona viloyati Marg‘ilonning atlas va adraslari, Rishtonning kulolchilik san’ati, Qo‘qonning yog‘och o‘ymakorligi va naqqoshlik maktablari bilan dunyoga mashhur.
Marg‘ilon azaldan atlas va adras tayyorlash markazi bo‘lib kelgan. Yo‘qolib borayotgan an’analarni tiklash va asrab-avaylash maqsadida 2007-yilda Marg‘ilonda hunarmandchilikni rivojlantirish markazi ochilib, hozirga qadar atlas va adras matolarini tayyorlash texnologiyasini saqlash, rivojlantirish va ommaviylashtirish bilan shug‘ullanib kelmoqda.
Marg‘ilon va unga tutash tumanlarda mato va gilam to‘qimachiligi, milliy libos va milliy poyabzal tayyorlash bilan 3 mingga yaqin, Rishton tumanida an’anaviy kulolchilik bilan 5 mingdan ortiq, Qo‘qon shahri va unga tutash hududlarda yog‘och o‘ymakorligi, zargarlik kabi hunarmandchilik turlari bilan 10 mingga yaqin oilalar shug‘ullanadi.
Bugungi kunda shaharda atlas, adras, beqasam va shoyi to‘qish bilan 600 dan ortiq usta shug‘ullanadi. Hunarmandlar tomonidan qadimiy namunalar asosida ishlab chiqarilayotgan “Marg‘ilon”, “Navro‘z”, “Rasadxona”, “Bibixonim”, “Bargi karam”, “Chaqirim”, “Namozshomgul”, “Qora ko‘zim”, “Begoyim”, “O‘zbekiston go‘zali”, “Qo‘chqorshox”, “Guldasta”, “Kelinchak atlas” deb nomlangan ipak matolarga bugun dunyo miqyosida qiziqish yuqori.
Marg‘ilon hunarmandlari yaratgan gilamlar, ipak matolar, zargarlik va zardo‘zlik buyumlari dunyoning turli mamlakatlaridan kelgan sayyohlarni hayratga solmoqda.
Festival doirasida “Zamonaviy dunyoda an’anaviy to‘qimachilikning o‘rni” xalqaro konferensiyasi, “Buyuk ipak yo‘li vorislari” an’anaviy to‘qimachilik mahsulotlari ko‘rgazmasi, “Ikat mahsulotlarining ishlab chiqilishi va eksporti sohasidagi muvaffaqiyatlar va to‘siqlar” mavzusida davra suhbati o‘tkazildi.
Xalq sayillari sportchi yoshlarning ko‘rgazmali chiqishlari, dorbozlar va milliy o‘yinlar musobaqalari bilan boshlandi. Kurash, arqon tortish, xalq amaliy san’ati — folklor namunalari, bir-biridan mazali milliy taomlar tanlovlari o‘tkazildi.
To‘qimachilik va amaliy san’at buyumlari yarmarkasi, askiya va katta ashula ijrochiligi, folklor ansambllari, xalq ijrochilarining dasturlari, konsertlar va qo‘g‘irchoq teatrlari tomoshalari namoyish qilindi.
Folklor guruhlari, xalq ansambllari, badiiy havaskorlik jamoalari tomonidan xalqona kuy-qo‘shiqlar, o‘lan-laparlar ijro etildi. Bog‘ bo‘ylab o‘rnatilgan doshqozonlarda osh damlanib, bayram ishtirokchilariga tarqatildi.
O‘zbekistonning turli viloyatlari vakillari tomonidan maxsus pavilyonlar tashkil etilib, o‘sha hududga xos urf-odatlar ko‘rsatib berildi, xalq amaliy san’ati va hunarmandchilik mahsulotlari ko‘rgazmalari o‘tkazildi.
Ijodkorlar bog‘ida “Atlas bayrami” beshinchi xalqaro an’anaviy to‘qimachilik festivalining yopilish marosimi bo‘lib o‘tdi. Unda turli nominatsiya bo‘yicha g‘oliblar e’lon qilinib, taqdirlandi.
Munojot Yo‘lchiyeva, Ilhom Ibrohimov, Gulsanam Mamazoitova kabi taniqli san’atkorlar ishtirokidagi konsert dasturi festival ishtirokchilariga bayramona kayfiyat ulashdi.
Izoh (0)