Yakunlanayotgan haftada Qoraqalpog‘istonda vazirlar “ta’zirini yegan” bo‘lsa, Surxondaryo va Qashqadaryoda sobiq hokimlar qamaldi. Namangan viloyatida esa maktab o‘quvchisi o‘qituvchisi tomonidan ayovsiz kaltaklandi. “Daryo” doimgidek hafta yakunida hududlardagi eng shov-shuvli voqealarni esga olishda davom etadi.
Namangan viloyatining Davlatobod tumanida 5-sinf o‘quvchisi sinf rahbari tomonidan ayovsiz kaltaklandi. Mazkur voqea joriy yil 13-oktabr kuni Namangan shahrining Davlatobod tumanidagi 58-davlat ixtisoslashtirilgan umumta‘lim maktabida ro‘y bergan. Maktabning 5-sinfida o‘qiydigan qizlar sinf rahbarlari bo‘lgan geografiya fani o‘qituvchisiga sinfdosh bola ustidan shikoyat qiladi. Pedagog bolaga tanbeh bergan payt oradan gap qochadi. Shundan so‘ng 27 yashar o‘qituvchi yigit hissiyotlari va qo‘liga erk beradi.
“Bo‘lib o‘tgan voqeadan o‘zim ham, maktab jamoasi ham shok holatida. Chunki o‘qituvchi hech qachon tajovuzkor kayfiyatda bo‘lmagan, o‘sha vaziyatda o‘zini boshqarolmagani uchun ming pushaymon. Biz o‘zimiz ham qayerda qanday xato o‘tganini qayta-qayta tahlil qilyapmiz. O‘sha kundan beri tinchimiz buzilgan, kimga nima deyishni bilmaymiz. Chunki yuz bergan holat pedagogning kasb etikasiga mutlaqo to‘g‘ri kelmaydi. O‘quvchi baribir o‘quvchi, bola baribir bola. Shunday nufuzli dargohga yarashmaydigan va maktab tarixida umuman kuzatilmagan hodisa yuz berdi. Bundan nihoyatda afsusdamiz”, — deydi direktor.
Holat yuzasidan jinoyat ishi qo‘zg‘atilib, jinoyat ishi qo‘zg‘atilgan.
Nukus shahrida maktab o‘quvchilari ishtirokida bo‘lib o‘tgan shaxmat bo‘yicha Qoraqalpog‘iston birinchiligi g‘oliblariga mayka va futbolka berilgani xabar berildi. Holat ijtimoiy tarmoqlarda kulgi aralash muhokamalarni keltirib chiqardi. Shundan so‘ng Qoraqalpog‘iston xalq ta’limi vazirligi sovrindorlarga qo‘shimcha tarzda elektr pech sovg‘a qildi.
Qoraqalpog‘istonda shuningdek, to‘yni tasvirga olishda hayotini xavf ostiga qo‘ygan videotasvirchilar va avtomobil haydovchisi javobgarlikka tortildi.
Respublikada shuningdek, mazkur haftada 3 nafar vazir ta’zirini oldi.
Dastlab Qoraqalpog‘iston Respublikasi transport vaziri Sultanbay Saparovga nisbatan intizomiy chora qo‘llanildi. U prezident Shavkat Mirziyoyev boshchiligida o‘tkazilgan majlis bayonnomasiga muvofiq Nukus shahri transport modelining Bosh rejasini ishlab chiqish, shuningdek, Vazirlar Mahkamasi qaroriga muvofiq 2022-yilda 50 dona avtobus sotib olish, 1 dona logistika markazi va 1 dona avtostansiya qurish, 2 dona temiryo‘l vokzalini rekonstruksiya qilish bo‘yicha topshiriqlarni bajarmagan.
Shuningdek, Qoraqalpog‘iston xalq ta‘limi vaziri Axmed Narimbetov va maktabgacha ta‘lim vaziri Gulzira Baxiyevaga hayfsan berildi.
Mazkur haftada shuningdek Termiz shahrining sobiq hokimi Isroil Xudoyberdiyev qamoqqa olingani, u va sheriklari 14,8 milliard so‘mni o‘zlashtirishda ayblanayotgani xabar berildi. Keyinchalik Bosh prokuratura sobiq hokim va uning sheriklari davlat, jamiyat va tadbirkorlar manfaatiga salkam 36 milliard so‘m zarar keltirganini ochiqladi. Sobiq hokimlarning qamalish voqeasi Qashqadaryoda ham davom etib, Qarshi shahrining sobiq hokimi Jamshid Fozilov dastlab davlat manfaatiga 60 milliard so‘mdan ortiq zarar yetkazishda ayblanib, unga nisbatan qamoqqa olish ehtiyot chorasi qo‘llanilgani va Jinoyat ishlari bo‘yicha Qarshi shahar sudi qarori bilan sobiq hokimga nisbatan qo‘llanilgan qamoq bekor qilinib, Fozilov uy qamog‘iga olingani ma’lum bo‘ldi. Qashqadaryo prokuraturasi sudning mazkur qaroriga protest keltirib, Jamshid Fozilovni qamoqqa olish tarzidagi ehtiyot chorani o‘z kuchida qoldirishga erishdi.
Izoh (0)