22 октябрь куни соат 04:55 да Сирдарё вилояти Малик аҳоли пунктидаги Мудофаа вазирлиги омборида якка тартибда портлаш содир бўлганди. Ушбу ҳодиса оқибатида жароҳат олган 16 нафар беморнинг 12 нафари Сирдарё тумани тиббиёт бирлашмасига олиб келинган. Барча жароҳат олганларга зудлик билан биринчи ёрдам кўрсатилган. Ҳисоб-китобларга кўра, 3742 та турар ва нотурар жойнинг томи, шифти, дераза ва эшик ромларига қисман талафот етган.
«Дарё» мухбири воқеа жойида бўлиб, репортаж тайёрлади.
Ҳарбий қисм атрофида жойлашган маҳаллада истиқомат қилувчи Рўзахон Исоқованинг айтишича, аввал кучли портлаш бўлган, кейин қаттиқ овоз чиққан.
«Бомдод намозини ўқишга турган эдим. Айвонга чиққанимда қаттиқ овоз келиб, деразага нимадир келиб урилди. Қўрққанимдан дод деб, қалтираб кетдим. Ошхонамиздаги газ баллонни портлаб кетдимикан, деб ўйладим. Бирпасдан кейин гувуллаган овоз учиб ўтди. Осмон қоп-қора тутун, атроф чанг бўлиб кетганди. Ойналар синиб, уйим деворига ёриқ кетди. Ҳалигача ўзимга келолганим йўқ. Украинадагилар қандай чидаяпти экан-а? У ерларда ҳар куни портлаш бўляпти. Биздаги битта портлашга шунчалик бўлган бўлса», — деди Рўзахон Исоқова.
Унинг қўшимча қилишича, маҳаллага бириктирилган ҳоким ёрдамчиси келиб, хонадон эгаларидан ҳол-аҳвол сўраб кетган.
Ҳолатга гувоҳ бўлган яна бир фуқаро Меҳри Ҳайдарованинг айтишича, аввал атроф ёришиб кетган, кейин қаттиқ овоз чиқиб, гумбурлаган.
«Зилзилада бўлгани каби уй қимирлаб кетди. Невараларим қўрқиб, дод солишди. Ойналар сингани, шифтлар кўчиб тушганини ҳисобга олмаса, ўзимизга ҳеч қандай зарар етгани йўқ», — деди Меҳри Ҳайдарова.
Ҳарбий қисмдан 900 метр узоқликда иккита товуқ фермаси жойлашган Фарҳод Ҳайдаровнинг айтишича, ферма биноларига жуда катта зарар етган.
«Ўша ҳарбий қисм яқинида иккита товуқ фермамиз бор эди. Ферма биносининг шифтлари тушиб, 50 га яқин дарчаси синиб кетган. Томга нимадир келиб тушган, шиферлари майдаланиб, йўқ бўлиб кетган. Катта устунларига шикаст етибди. Кичкина тешикдан зарб кириб, эшик ва ромларни 10 метр узоқликка отиб юборган. Шифрларни михидан чиқариб ташлаган. Худди қозиқ қоққандек бетон бўлаклари ерга кириб кетган», — деди Фарҳод Ҳайдаров.
Унинг қўшимча қилишича, сапёрлар гуруҳи атрофларни ўрганиб, бомбанинг қолдиқларини териб, ўша ерга белги қўйиб кетишган.
«Дарё» мухбири билан суҳбатлашган гувоҳларнинг айтишича, портлаш таъсири Тошкент вилоятининг Чиноз ва Янгийўл туманигача етиб келган.
Ҳозирда портлаш радиуси қанча бўлгани ва унинг аниқ сабаблари айтилганича йўқ.
Янгиер шаҳар ҳокими Отабек Носировнинг маълум қилишича, республика ва вилоят мутасаддилари томонидан тезкор ишчи гуруҳлари тузилиб, ҳар бир маҳалла кесимида етказилган зарар ўрганиб чиқилган.
«Етказилган зарар жадвал асосида ўрганиб чиқилди. Шунга мувофиқ аҳолига ойна ва ром, шифер маҳсулотлари етказиб берилмоқда», — деди Отабек Носиров.
Сирдарё вилояти ҳокимлиги берган маълумотга кўра, портлашдан зарар кўрган турар ва нотурар жой биноларга 10 минг квадрат ойна ва 4,5 минг листдан ортиқ шифер етказиб берилган.
Мудофаа вазирлигининг билдиришича, айни вақтда ҳудудга жалб этилган ҳарбий хизматчилар томонидан ҳарбий қисм атрофидаги айрим маҳаллаларнинг шикаст етган хонадонлари кўздан кечирилиб, уй эгаларига ёрдам кўрсатиляпти.
«Хонадонларнинг ойналари янгиланмоқда, том қисмига зарар етган объектлар таъмирланяпти. Ҳосил бўлган чиқиндилар тўлиқ тозаланяпти. Ҳарбий қисм ҳудудида жойлашган ҳарбий шаҳарчада ҳам айрим хонадонларнинг синган ойналари ва эшиклари таъмирланмоқда», — дейилади вазирлик ахборотида.
Изоҳ (0)