“Manchester Yunayted” hujumchisi Krishtianu Ronalduning kelajagi so‘roq ostida qolmoqda.
AS nashrining xabariga ko‘ra, portugaliyalik futbolchi jamoadagi holatidan norozi va vaziyat o‘zgarishini kutmoqda.
Ronalduning atrofidagilar u APLni tark etishi va osonroq ligaga, masalan, MLSga yo‘l olishi kerak deya hisoblamoqda.
Avvalroq “Manchester Yunayted” 37 yoshli futbolchini tekinga bo‘lsa ham qo‘yib yuborishga tayyor ekanligini xabar qilingandi. Chunki hujumchi juda katta maosh oladi.
Portugaliyalikka “Chelsi” qiziqish bildirmoqda. Klubning xo‘jayini va sport direktori Todd Boeli Ronalduning kelishi klub brendi uchun yaxshi bo‘ladi deya hisoblamoqda.
Boeli sobiq murabbiy Tomas Tuxeldan Krishtianu variantini ko‘rib chiqishni bir necha bor so‘ragan, biroq nemis mutaxassisi bu g‘oyani rad etgan. Shundan buyon hech narsa o‘zgarmadi. Ronalduning agenti Jorje Mendesh esa “Chelsi” bilan muzokaralarni to‘xtatdi.
Klub xo‘jayini transferlarni bosh murabbiy Grem Potter bilan maslahatlashadi. Potterni esa hozirda Rafael Leau (“Milan”), Jonatan Devid (“Lill”) va Ayven Touni (“Brentford”) nomzodlari qiziqtirmoqda.
Mendeshning atrofidagilar “Chelsi” Ronaldu transferini rasmiylashtirish qobiliyatiga ega emas deya hisoblamoqda. Kamiga futbolchi London klubidan o‘yin amaliyotiga ega bo‘lishi uchun va’da olishi kerak bo‘ladi.
Mendesh mijozining “Roma”ga (agarda jamoa keyingi mavsum Chempionlar Ligasiga chiqa olsa) yoki MLS’ga o‘tishini istamoqda.
Izoh (0)