Криштиану Роналдунинг атрофидагилари у АПЛни тарк этишини хоҳламоқда

«Манчестер Юнайтед» ҳужумчиси Криштиану Роналдунинг келажаги сўроқ остида қолмоқда.

АС нашрининг хабарига кўра, португалиялик футболчи жамоадаги ҳолатидан норози ва вазият ўзгаришини кутмоқда.

Роналдунинг атрофидагилар у АПЛни тарк этиши ва осонроқ лигага, масалан, MLSга йўл олиши керак дея ҳисобламоқда.

Аввалроқ «Манчестер Юнайтед» 37 ёшли футболчини текинга бўлса ҳам қўйиб юборишга тайёр эканлигини хабар қилинганди. Чунки ҳужумчи жуда катта маош олади.

Португалияликка «Челси» қизиқиш билдирмоқда. Клубнинг хўжайини ва спорт директори Тодд Боэли Роналдунинг келиши клуб бренди учун яхши бўлади дея ҳисобламоқда.

Боэли собиқ мураббий Томас Тухелдан Криштиану вариантини кўриб чиқишни бир неча бор сўраган, бироқ немис мутахассиси бу ғояни рад этган. Шундан буён ҳеч нарса ўзгармади. Роналдунинг агенти Жорже Мендеш эса «Челси» билан музокараларни тўхтатди.

Клуб хўжайини трансферларни бош мураббий Грем Поттер билан маслаҳатлашади. Поттерни эса ҳозирда Рафаэл Леау («Милан»), Жонатан Дэвид («Лилл») ва Айвен Тоуни («Брентфорд») номзодлари қизиқтирмоқда.

Мендешнинг атрофидагилар «Челси» Роналду трансферини расмийлаштириш қобилиятига эга эмас дея ҳисобламоқда. Камига футболчи Лондон клубидан ўйин амалиётига эга бўлиши учун ваъда олиши керак бўлади.

Мендеш мижозининг «Рома»га (агарда жамоа кейинги мавсум Чемпионлар Лигасига чиқа олса) ёки MLS’га ўтишини истамоқда.