“Daryo” nashri 24-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Shoygu NATO mamlakatlari mudofaa vazirlariga qo‘ng‘iroq qilib, Ukraina “iflos bomba”ni portlatishga tayyorlanayotganini bildirdi
Rossiya mudofaa vaziri Sergey Shoyguning NATO mudofaa vazirlariga qo‘ng‘iroq qilib chiqishdan maqsadi G‘arbning Ukrainaga harbiy ko‘magini sekinlashtirish yoki to‘xtatishdan iborat bo‘lgan. Urushni tadqiq qilish instituti mutaxassislari shunday fikr bildirdi. Ularning qayd etishicha, Rossiya qo‘rquvni alanga oldirib, alyansni zaiflashtirmoqchi.
Eslatib o‘tamiz, Rossiya mudofaa vaziri Sergey Shoygu 23-oktabr kuni Fransiya, Turkiya, Buyuk Britaniya va AQSH mudofaa vazirlari bilan telefon orqali bog‘langan va muzokaralar chog‘ida “Ukraina tomonidan ‘iflos bomba’ qo‘llangan holda provokatsiyalar amalga oshirilishi ehtimoli yuzasidan o‘z xavotirini” bildirgan. Rossiya Mudofaa vazirligi ushbu versiyani asoslovchi hech qanday dalillarni taqdim etmagan.
Muzokaralardan avvalroq Shoygu “RIA Novosti”ga bergan intervyusida “Kiyev rejimi Ukrainada ‘iflos bomba’ ishtirokida provokatsiya tayyorlayotgani” haqida ma’lum qilgan edi.Buyuk Britaniya mudofaa vaziri Ben Uolles Sergey Shoyguni keskin vaziyatni yanada kuchaytirish uchun bahona sifatida bunday bayonotlarni qo‘llamaslikka chaqirdi.
Ukraina hukumati esa “iflos bomba” haqidagi xabarlarni yolg‘on deb atadi. Ukraina tashqi ishlar vaziri Dmitriy Kulebaning ta’kidlashicha, Ukraina Yadro quroli tarqatmaslik haqidagi shartnomani qo‘llab-quvvatlaydi. “Bizda hech qanaqa ‘iflos bombalar’ yo‘q va biz ularga ega bo‘lishni rejalashtirmayapmiz”, — degan Kuleba.
O‘z o‘rnida Ukraina prezidenti Vladimir Zelenskiy vaziyatga quyidagicha baho bergan: “Rossiya o‘zi kelgan hamma joyda o‘zidan keyin ommaviy qabrlar, zindonlar, vayron bo‘lgan shahar va qishloqlar, minalangan yerlar, yo‘q qilingan infratuzilma va tabiiy ofatlarni qoldiradi. Yevropaning bizga tegishli qismida yadro quroli qo‘llashi mumkin bo‘lgan faqat bitta subyekt bor — va shu subyektning o‘zi o‘rtoq Shoyguga kimlargadir qo‘ng‘iroq qilishni buyurgan”.
Isroil Ukrainaga Eron dronlariga qarshi kurashish uchun razvedka ma’lumotlarini taqdim etgan — NYT
Isroil Ukraina harbiylariga Eron dronlariga qarshi kurashish uchun zarur bo‘lgan razvedka ma’lumotlarini taqdim etgan, deb yozadi New York Times ukrainalik mansabdorga tayanib.
13-oktabr kuni Kiyev viloyatida muhim infratuzilma obyektlari kamikadze dronlar zarbalariga uchradi. Shundan keyin Ukraina tashqi ishlar vaziri Dmitriy Kuleba Isroil hukumatiga rasmiy nota yuborib, Kiyevga havo hujumiga qarshi mudofaa tizimlarini yetkazishni so‘rashini ma’lum qilgan.
18-oktabr kuni Isroil va Ukraina mudofaa vazirlari Benni Gans va Aleksey Reznikov o‘rtasida telefon orqali muloqot o‘tkazilishi kerak bo'lsada, biroq Isroil tomoni so‘nggi lahzada qo‘ng‘iroqni rad etdi.
Muzokaralardan bosh tortilishini nashr Rossiya Xavfsizlik kengashi raisi o‘rinbosari Dmitriy Medvedevning bayonoti bilan bog‘lamoqda, u avvalroq “Isroil tomonidan Kiyevga qurol-yarog‘ berilishi mamlakatlarimiz o‘rtasidagi barcha davlatlararo munosabatlarni buzishi” haqida ogohlantirgandi. Ertasi kuni Gans, Isroil Ukrainaga qurol taqdim etmasligini ma’lum qildi.
Ukrainada yalpi safarbarlikni boshlash rejalashtirilmoqda — OAV
Ukraina yalpi safarbarlik e’lon qilishni rejalashtirmoqda. Bu haqda mahalliy nashrlar Ukraina Mudofaa vazirligiga tayanib xabar bermoqda. Kiyev Rossiyada e’lon qilingan qisman safarbarlik tufayli, frontda Rossiya armiyasi son jihatdan ustun kelishidan xavfsiramoqda.
Xabarda aytilishicha, Ukrainada umumiy safarbarlik 24-fevraldayoq e’lon qilingan bo‘lsa-da, yangi bo‘linmalarni tashkil qilish va qurollantirish bo‘yicha cheklangan imkoniyatlarni hisobga olganda, yalpi safarbarlikka ehtiyoj bo‘lmagan, ammo endi vaziyat o‘zgarmoqda.
Avvalroq Kiyev to‘ldirish markazi boshlig‘i Maksimov Ukraina qo‘shinlarini to‘ldirishga ehtiyoj borligini, shu sababli hamma joyda harbiy majburiyatga ega erkaklarning barchasiga chaqiriq qog‘ozi topshirilishini aytgandi.
Ayni vaziyatda Shols va fon der Lyayyen Ukraina uchun “Marshall rejasi” tuzilishini yoqlab chiqdi. Ukraina uchun “Marshall rejasi” zarur, uni hoziroq ishlab chiqishni boshlash kerak, dedi Germaniya kansleri Olaf Shols va Yevrokomissiya rahbari, Germaniya sobiq mudofaa vaziri Ursula fon der Lyayyen Frankfurter Allgemeine Zeitung nashri uchun yozgan maqolasida. Maqola Berlinda Ukrainani qayta tiklash bo‘yicha konferensiya arafasida e’lon qilindi, unda, shu jumladan, Ukraina bosh vaziri Denis Shmigal ham qatnashadi.
Shols va fon der Lyayyen maqolada eslatishicha, Ukraina Yevroittifoqqa a’zo bo‘lish uchun nomzoddir. “Shuning uchun qayta tiklanish sari yo‘l — Ukrainaning Yevroittifoqqa tomon yo‘li hamdir. Ukraina qoidalarga asoslangan xalqaro tartibni, bizning tinchligimiz asosini, butun dunyo taraqqiyotini ham himoya qilmoqda. Shuning uchun biz Ukrainani qo‘llab-quvvatlayotgan bo‘lsak, demak o‘z kelajagimizni, bizning umumiy Yevropamiz kelajagini qurayotgan bo‘lamiz”, — deya qayd etdi siyosatchilar. Yevrokomissiya rahbari va kansler shuni ham ta’kidladiki, Ukrainani qayta tiklash avlodlar vazifasidir, unga esa bugun kirishish kerak.
“Bo‘lib o‘tgan hodisa yuzasidan hozirda tergov harakatlari olib borilmoqda” — Sherzod Asadov
Prezident matbuot kotibi Sherzod Asadov Sirdaryoda sodir bo‘lgan portlash yuzasidan izoh berdi. Bu haqda “Daryo” muxbiri xabar bermoqda.
“OAV va blogerlarimiz tomonidan har xil fikrlar, savol tug‘ilyapti. Demak, bu portlashning tasnifi bo‘yicha. Yakka portlash nima degani o‘zi. Bu keyinchalik detonatsiya bermagan portlash. Ya’ni agar mana shu omborni oladigan bo‘lsak, bu omborxona 20-asrning 40 yillarida qurilgan, ilgari texnik qoidalarga ko‘ra juda ko‘p miqdorda qurol-yarog‘ saqlangan. Ammo 2016-yildan so‘ng prezident topshirig‘iga ko‘ra barcha omborlar rekonstruksiya qilinmoqda. Barchasining atrofida jahon standartlariga ko‘ra kichik omborlar qurilmoqda va ularda kam miqdorda qurol-yarog‘ saqlanmoqda.
Barcha obyektlarda jahon standartlariga ko‘ra qo‘yiladigan talab asosida injener-muhandislik ishlari olib borilmoqda. Sirdaryo viloyatidagi portlash ham shunday omborlardan birida sodir bo‘lgan va xavfsizlik talablariga amal qilingani tufayli katta talafot bo‘lmadi. Bo‘lib o‘tgan hodisa yuzasidan hozirda tergov harakatlari olib borilmoqda va bunga olib kelgan barcha omillar inobatga olinib, keng jamoatchilikka e’lon qilinadi”, — degan Sherzod Asadov
Izoh (0)