Shols va fon der Lyayyen Ukraina uchun “Marshall rejasi” tuzilishini yoqlab chiqdi

Ukraina uchun “Marshall rejasi” zarur, uni hoziroq ishlab chiqishni boshlash kerak, dedi Germaniya kansleri Olaf Shols va Yevrokomissiya rahbari, Germaniya sobiq mudofaa vaziri Ursula fon der Lyayyen Frankfurter Allgemeine Zeitung nashri uchun yozgan maqolasida. Maqola Berlinda Ukrainani qayta tiklash bo‘yicha konferensiya arafasida e’lon qilindi, unda, shu jumladan, Ukraina bosh vaziri Denis Shmigal ham qatnashadi.

Shols va fon der Lyayyen maqolada eslatishicha, Ukraina Yevroittifoqqa a’zo bo‘lish uchun nomzoddir. “Shuning uchun qayta tiklanish sari yo‘l — Ukrainaning Yevroittifoqqa tomon yo‘li hamdir. Ukraina qoidalarga asoslangan xalqaro tartibni, bizning tinchligimiz asosini, butun dunyo taraqqiyotini ham himoya qilmoqda. Shuning uchun biz Ukrainani qo‘llab-quvvatlayotgan bo‘lsak, demak o‘z kelajagimizni, bizning umumiy Yevropamiz kelajagini qurayotgan bo‘lamiz”, — deya qayd etdi siyosatchilar.

Yevrokomissiya rahbari va kansler shuni ham ta’kidladiki, Ukrainani qayta tiklash avlodlar vazifasidir, unga esa bugun kirishish kerak.

Avgust oyida Shols Ukrainani jangovar harakatlardan keyin qayta tiklash “juda katta vazifa” bo‘lishini, “Marshall rejasi”dan ham kengroq ko‘lamli bo‘lishini, uni amalga oshirishga esa “milliardlab” mablag‘ kerak bo‘lishini aytgandi. Ukraina prezidenti Vladimir Zelenskiy mamlakat infratuzilmasini qayta tiklashni 600—800 milliard dollarga baholagan, uning ofisi mamlakatga har yili 30—100 milliard dollar kerak bo‘lishini qayd etgandi.

Fon der Lyayyen iyun oyida Ukrainaga vayron bo‘lgan infratuzilmani qayta tiklashda yordam berish Yevropaning ma’naviy burchi ekanini aytgandi. Shu bilan birga, Bryussel Ukrainani qayta qurish uchun rossiyalik biznesmenlarning muzlatib qo‘yilgan aktivlaridan foydalanish imkoniyatini ko‘rib chiqmoqda, degan edi fon der Lyayyen.