Bugun, 24-oktabr kuni Oliy sudda Sog‘liqni saqlash vazirligi va sobiq xodim o‘rtasidagi nizo takroriy kassatsiya sudlov hay’atida ko‘rib chiqildi. Bu haqda “Daryo” muxbiri Musulmonbek Ibrohimov xabar bermoqda.
Nima bo‘lgan edi?
Sog‘liqni saqlash vazirining tegishli buyrug‘i bilan 2021-yilning iyul oyida Kompleans, ichki audit va moliyaviy nazorat xizmati boshlig‘i Baxtiyor Xajixanovni ishdan bo‘shatgan edi. Bunga prezidentning sobiq maslahatchisi Abdujabbor Abduvohitovning SSVga yuborgan ko‘rsatma xati asos sifatida olingan. Davlat maslahatchisining xatiga muvofiq SSV xodimni Mehnat kodeksining 106-moddasi 6-bandi bilan “qonunda nazarda tutilgan boshqa hollar”da degan punkti bilan ishdan bo‘shatib yuborgan.
Fuqarolik ishlari bo‘yicha Shayxontohur tumanlararo sudi va Toshkent shahar sudi tomonidan bu xat qonunga tenglashtirilib, Mehnat kodeksining 106-modda 6-bandi bo‘yicha to‘g‘ri bo‘shatilgan deb topgan.
Ish joriy yilning 21-sentabr oyida Oliy sudning fuqarolik ishlari bo‘yicha kassatsiya sudlov hay’ati tomonidan ko‘rib chiqilgan. Unda sudyalar mehnat munosabatlarini bekor qilish masalasida biror-bir qonun bo‘yicha vakolatga ega bo‘lmagan davlat maslahatchisining xati xodimlarni to‘g‘ridan-to‘g‘ri ishdan olishga, xususan, Mehnat kodeksining 106-moddasi 6-bandi bilan mehnat shartnomasini bekor qilishga asos bo‘la olmaydi deb topgan edi.
Ajrim o‘z kuchida qoldi
Bugun, bosh prokuror o‘rinbosari Svetlana Ortiqovaning Oliy sudning fuqarolik ishlari bo‘yicha kassatsiya sudlov hay’ati ajrimi ustidan kiritgan protestiga asosan ish takroriy kassatsiya sudlov hay’atida ko‘rib chiqish boshlangandi. Kiritilgan protestda Oliy sudning avvalgi ajrimini bekor qilish hamda xodimni ishga tiklash to‘g‘risidagi talablarni qanoatlantirmaslik so‘ralgan.
Sudda bevosita ishtirok etgan “Daryo” muxbiring xabar berishicha, Oliy sudga bosh prokuror tomonidan alohida xat kiritilgan bo‘lib chiqqan. Ya’ni bosh prokuror o‘rinbosari tomonidan kiritilgan protestni qaytarib olish to‘g‘risida xat kiritilgan.
“Bu sud qiziq bo‘ldi. Bosh prokuror o‘rinbosari Svetlana Oriqovaning sobiq xodim to‘g‘ri bo‘shatilgan, deb ish beruvchi SSV foydasiga protest kiritgandi. Lekin amaliyotda kamdan kam uchraydigan holat yuz berdi: bosh prokuror o‘rinbosari noto‘g‘ri kiritgan protestni qaytarib oldi. Haqiqatdan ham bu noto‘g‘ri qilganligini anglab, tushunib qaytarib oldi. Biz uchun ushbu holat juda katta yangilik bo‘ldi. Natijada sudlov hay’ati bosh prokurorning xatini qanoatlantirdi hamda ish yuritishni tugatdi. Qonunchilikda ko‘zda tutilgan mana bunday amaliyotlarni uchrayotganligi fuqarolarda nafaqat Oliy sudga balki Bosh prokuraturaga bo‘lgan ishonch ortishiga ham olib keladi”, — dedi advokat Saidali Muxtoraliyev.
Oliy sudning takroriy kassatsiya sudlov hay’ati qaroriga ko‘ra, kassatsiya sudlov hay’atining ajrimi o‘z kuchida qoldi. Ya’ni SSVdan nohaq bo‘shatilgan sobiq xodim Baxtiyor Xajixanov o‘z ishiga tiklanadigan va unga yetkazilgan moddiy zarar (majburiy progul summasi) undirilib beriladigan bo‘ldi.
Izoh (2)
Етказилган зарарни бюджет эмас давлат маслаҳатчиси ўз ёнидан тўлаш керак анаўшанда буларни кўзи очилади.
Ey.... Bunday fuqarolardan qanchadan qancha, bu insonni omadlarini bersin, o'zlari ham yurist bo'lganliklari uchun oxirigacha kurashdilar, biroq prezidentning sobiq maslahatchisi Abdujabbor Abduvohitov hamda sobiq Oliy sud raisi Kozimjon Komilovlarning qilmishlaridan ancha buncha insonlar ishsiz qoldilar, eng qizig'i Abdujabbor yoki shunga o'hshagan insonlar tomonidan Prezident video selektor bayonnomasiga o'zgartirish kiritilib, ushbu bayonnoma asosida hamda ko'rsatma xatlar yuborilib ancha muncha hodim egallab turgan lavozimidan ozod etildi! Eng qizig'i bayonnomada go'yiki bu topshiriqni O'zR Prezidenti Shavkat Miromonovich Mirziyoyev topshirganday. Ammo Youtube.com video hostingidagi "Shavkat Mirziyoyev's Press-service" kanaliga qo'yib to'liq video selektor yig'ilishida esa bunday topshiriq umuman bo'lmaganligini ko'rish mumkin. Eng qizig'i, yuqoridagi maqolada aytib o'tilganidek bunday xujjatlar "qonunga tenglashtirilib" tuman, shahar sudyalari ishni ko'rib chiqish jarayonida da'vo arizalarni, keyinchalik apellyatsiya shikoyatlarini qanoatlantirmasdan, ishni yopib yuborishmoqda..! HAQIQAT - egiladi, bukiladi, biroq sinmaydi.... Ushbu maqolada keltirilgan holat kabi bir kunmas bir kun haqiqat yuzaga chiqadi yoki mazkur ishlarda noto'g'ri qaror qilganlarning o'ziga yokida yaqinlaridan qaydati!