Eron hukumati 6-avgust kuni Isroil foydasiga josuslik qilishda ayblangan Ruzbeh Vadi ismli erkakni qatl qilganini ma’lum qildi. Sud hukmiga ko‘ra, u iyun oyida bo‘lib o‘tgan Isroil bilan urush chog‘ida eronlik yadro olimlar haqida maxfiy ma’lumotlarni yahudiy davlatiga yetkazgan. Bu haqda The Times of Israel xabar berdi.
Eron sud tizimining Mizan Online saytida yozilishicha, Vadi fors maxfiy tashkilotlardan birida ishlagan va shu orqali yashirin ma’lumotlarga ega bo‘lgan. U internet orqali Isroilning Mossad razvedka xizmati tomonidan yollangan. Qatl osib o‘ldirish yo‘li bilan amalga oshirilgan.
Ma’lumot uchun, iyun oyining o‘rtalarida Isroil Eron hududiga, xususan yadroviy obyektlarga misli ko‘rilmagan bombardimonlar uyushtirib, yadro olimlari va yuqori lavozimli harbiy qo‘mondonlarning hayotiga zomin bo‘lgandi. Urushdan keyin Eron hukumati Isroil bilan hamkorlikda gumon qilingan shaxslarni tezkor sudlovdan o‘tkazishini e’lon qilgan. So‘nggi oylarda Mossad bilan ishlaganlikda ayblanib, bir necha kishi hibsga olingan va qatl etilgan.
Bundan tashqari, Eron hukumati 6-avgust kuni ekstremistik “Islom davlati” guruhiga a’zo bo‘lish va mamlakat ichida “terrorchilik hujumlari rejalashtirish”da ayblangan boshqa bir shaxsni ham qatl qilganini xabar qilmoqda. Xalqaro huquq tashkilotlari, jumladan, Amnesty International ma’lumotlariga ko‘ra, Eron dunyoda Xitoydan keyin eng ko‘p qatl o‘tkazuvchi davlat hisoblanadi.
Tehron va Isroil o‘rtasidagi urush 12 kundan so‘ng AQSH vositachiligida sulh bilan tugagan bo‘lsa-da, Eron ichida yahudiy josuslari va muxolifat kuchlarini fosh etishga qaratilgan keng ko‘lamli ichki operatsiyalar hamon davom etmoqda.
Izoh (0)