«Дарё» нашри 24 октябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Шойгу НАТО мамлакатлари мудофаа вазирларига қўнғироқ қилиб, Украина «ифлос бомба»ни портлатишга тайёрланаётганини билдирди
Россия мудофаа вазири Сергей Шойгунинг НАТО мудофаа вазирларига қўнғироқ қилиб чиқишдан мақсади Ғарбнинг Украинага ҳарбий кўмагини секинлаштириш ёки тўхтатишдан иборат бўлган. Урушни тадқиқ қилиш институти мутахассислари шундай фикр билдирди. Уларнинг қайд этишича, Россия қўрқувни аланга олдириб, альянсни заифлаштирмоқчи.
Эслатиб ўтамиз, Россия мудофаа вазири Сергей Шойгу 23 октябрь куни Франция, Туркия, Буюк Британия ва АҚШ мудофаа вазирлари билан телефон орқали боғланган ва музокаралар чоғида «Украина томонидан ‘ифлос бомба’ қўлланган ҳолда провокациялар амалга оширилиши эҳтимоли юзасидан ўз хавотирини» билдирган. Россия Мудофаа вазирлиги ушбу версияни асословчи ҳеч қандай далилларни тақдим этмаган.
Музокаралардан аввалроқ Шойгу «РИА Новости»га берган интервьюсида «Киев режими Украинада ‘ифлос бомба’ иштирокида провокация тайёрлаётгани» ҳақида маълум қилган эди.Буюк Британия мудофаа вазири Бен Уоллес Сергей Шойгуни кескин вазиятни янада кучайтириш учун баҳона сифатида бундай баёнотларни қўлламасликка чақирди.
Украина ҳукумати эса «ифлос бомба» ҳақидаги хабарларни ёлғон деб атади. Украина ташқи ишлар вазири Дмитрий Кулебанинг таъкидлашича, Украина Ядро қуроли тарқатмаслик ҳақидаги шартномани қўллаб-қувватлайди. «Бизда ҳеч қанақа ‘ифлос бомбалар’ йўқ ва биз уларга эга бўлишни режалаштирмаяпмиз», — деган Кулеба.
Ўз ўрнида Украина президенти Владимир Зеленский вазиятга қуйидагича баҳо берган: «Россия ўзи келган ҳамма жойда ўзидан кейин оммавий қабрлар, зиндонлар, вайрон бўлган шаҳар ва қишлоқлар, миналанган ерлар, йўқ қилинган инфратузилма ва табиий офатларни қолдиради. Европанинг бизга тегишли қисмида ядро қуроли қўллаши мумкин бўлган фақат битта субъект бор — ва шу субъектнинг ўзи ўртоқ Шойгуга кимларгадир қўнғироқ қилишни буюрган».
Исроил Украинага Эрон дронларига қарши курашиш учун разведка маълумотларини тақдим этган — NYT
Исроил Украина ҳарбийларига Эрон дронларига қарши курашиш учун зарур бўлган разведка маълумотларини тақдим этган, деб ёзади New York Times украиналик мансабдорга таяниб.
13 октябрь куни Киев вилоятида муҳим инфратузилма объектлари камикадзе дронлар зарбаларига учради. Шундан кейин Украина ташқи ишлар вазири Дмитрий Кулеба Исроил ҳукуматига расмий нота юбориб, Киевга ҳаво ҳужумига қарши мудофаа тизимларини етказишни сўрашини маълум қилган.
18 октябрь куни Исроил ва Украина мудофаа вазирлари Бенни Ганс ва Алексей Резников ўртасида телефон орқали мулоқот ўтказилиши керак бўлсада, бироқ Исроил томони сўнгги лаҳзада қўнғироқни рад этди.
Музокаралардан бош тортилишини нашр Россия Хавфсизлик кенгаши раиси ўринбосари Дмитрий Медведевнинг баёноти билан боғламоқда, у аввалроқ «Исроил томонидан Киевга қурол-яроғ берилиши мамлакатларимиз ўртасидаги барча давлатлараро муносабатларни бузиши» ҳақида огоҳлантирганди. Эртаси куни Ганс, Исроил Украинага қурол тақдим этмаслигини маълум қилди.
Украинада ялпи сафарбарликни бошлаш режалаштирилмоқда — ОАВ
Украина ялпи сафарбарлик эълон қилишни режалаштирмоқда. Бу ҳақда маҳаллий нашрлар Украина Мудофаа вазирлигига таяниб хабар бермоқда. Киев Россияда эълон қилинган қисман сафарбарлик туфайли, фронтда Россия армияси сон жиҳатдан устун келишидан хавфсирамоқда.
Хабарда айтилишича, Украинада умумий сафарбарлик 24 февралдаёқ эълон қилинган бўлса-да, янги бўлинмаларни ташкил қилиш ва қуроллантириш бўйича чекланган имкониятларни ҳисобга олганда, ялпи сафарбарликка эҳтиёж бўлмаган, аммо энди вазият ўзгармоқда.
Аввалроқ Киев тўлдириш маркази бошлиғи Максимов Украина қўшинларини тўлдиришга эҳтиёж борлигини, шу сабабли ҳамма жойда ҳарбий мажбуриятга эга эркакларнинг барчасига чақириқ қоғози топширилишини айтганди.
Айни вазиятда Шольц ва фон дер Ляйен Украина учун «Marshall режаси» тузилишини ёқлаб чиқди. Украина учун «Marshall режаси» зарур, уни ҳозироқ ишлаб чиқишни бошлаш керак, деди Германия канцлери Олаф Шольц ва Еврокомиссия раҳбари, Германия собиқ мудофаа вазири Урсула фон дер Ляйен Frankfurter Allgemeine Zeitung нашри учун ёзган мақоласида. Мақола Берлинда Украинани қайта тиклаш бўйича конференция арафасида эълон қилинди, унда, шу жумладан, Украина бош вазири Денис Шмигал ҳам қатнашади.
Шольц ва фон дер Ляйен мақолада эслатишича, Украина Евроиттифоққа аъзо бўлиш учун номзоддир. «Шунинг учун қайта тикланиш сари йўл — Украинанинг Евроиттифоққа томон йўли ҳамдир. Украина қоидаларга асосланган халқаро тартибни, бизнинг тинчлигимиз асосини, бутун дунё тараққиётини ҳам ҳимоя қилмоқда. Шунинг учун биз Украинани қўллаб-қувватлаётган бўлсак, демак ўз келажагимизни, бизнинг умумий Европамиз келажагини қураётган бўламиз», — дея қайд этди сиёсатчилар. Еврокомиссия раҳбари ва канцлер шуни ҳам таъкидладики, Украинани қайта тиклаш авлодлар вазифасидир, унга эса бугун киришиш керак.
«Бўлиб ўтган ҳодиса юзасидан ҳозирда тергов ҳаракатлари олиб борилмоқда» — Шерзод Асадов
Президент матбуот котиби Шерзод Асадов Сирдарёда содир бўлган портлаш юзасидан изоҳ берди. Бу ҳақда «Дарё» мухбири хабар бермоқда.
«ОАВ ва блогерларимиз томонидан ҳар хил фикрлар, савол туғиляпти. Демак, бу портлашнинг таснифи бўйича. Якка портлаш нима дегани ўзи. Бу кейинчалик детонация бермаган портлаш. Яъни агар мана шу омборни оладиган бўлсак, бу омборхона 20-асрнинг 40 йилларида қурилган, илгари техник қоидаларга кўра жуда кўп миқдорда қурол-яроғ сақланган. Аммо 2016 йилдан сўнг президент топшириғига кўра барча омборлар реконструкция қилинмоқда. Барчасининг атрофида жаҳон стандартларига кўра кичик омборлар қурилмоқда ва уларда кам миқдорда қурол-яроғ сақланмоқда.
Барча объектларда жаҳон стандартларига кўра қўйиладиган талаб асосида инженер-муҳандислик ишлари олиб борилмоқда. Сирдарё вилоятидаги портлаш ҳам шундай омборлардан бирида содир бўлган ва хавфсизлик талабларига амал қилингани туфайли катта талафот бўлмади. Бўлиб ўтган ҳодиса юзасидан ҳозирда тергов ҳаракатлари олиб борилмоқда ва бунга олиб келган барча омиллар инобатга олиниб, кенг жамоатчиликка эълон қилинади», — деган Шерзод Асадов
Изоҳ (0)