Si Szinpin Xitoy xalqining buyuk vazifasi mamlakatni modernizatsiya qilish ekanini aytdi

Xitoyni modernizatsiya qilish butun Xitoy xalqi oldida turgan “buyuk, shu bilan birga murakkab vazifa”. Bu haqda Xitoy Kommunistik partiyasi Markaziy qo‘mitasi bosh kotibi, Xitoy xalq respublikasi raisi Si Szinpin uchinchi muddatga saylanganidan keyingi nutqida gapirdi.

“Xitoyga xos modernizatsiya XKP va Xitoy xalqi tomonidan olib boriladigan uzoq yillik amaliy tajriba va tadqiqotlar natijasidir. Bu juda ulkan va murakkab vazifa”, — dedi u.

Shuningdek, Si Szinpin “modernizatsiyalangan sotsialistik davlat qurish Xitoy xalqining manfaatlari va intilishlariga mos kelishini” ta’kidladi.

23-oktabr kuni XKP Markaziy Qo‘mitasi Si Szinpinni uchinchi marta besh yillik muddatga Bosh kotib etib sayladi. Ovoz berish Xitoy Kommunistik partiyasi 20-Markaziy qo‘mitasining birinchi plenumida bo‘lib o‘tdi. XXR raisi Si Szinpin davlat rahbari va Xitoy xalq respublikasi Markaziy harbiy kengashi raisi lavozimlarini saqlab qolishi kutilmoqda.

Si Szinpindan oldingi prezidentlar mamlakatni ikki besh yillik muddatga boshqargan. Biroq 2018-yilda konstitutsiyaga o‘zgartirish kiritilib, mamlakatni cheksiz muddatga boshqarishga ruxsat berildi.