Си Цзиньпин Хитой халқининг буюк вазифаси мамлакатни модернизация қилиш эканини айтди

Хитойни модернизация қилиш бутун Хитой халқи олдида турган «буюк, шу билан бирга мураккаб вазифа». Бу ҳақда Хитой Коммунистик партияси Марказий қўмитаси бош котиби, Хитой халқ республикаси раиси Си Цзиньпин учинчи муддатга сайланганидан кейинги нутқида гапирди.

«Хитойга хос модернизация ХКП ва Хитой халқи томонидан олиб бориладиган узоқ йиллик амалий тажриба ва тадқиқотлар натижасидир. Бу жуда улкан ва мураккаб вазифа», — деди у.

Шунингдек, Си Цзиньпин «модернизацияланган социалистик давлат қуриш Хитой халқининг манфаатлари ва интилишларига мос келишини» таъкидлади.

23 октябрь куни ХКП Марказий Қўмитаси Си Цзиньпинни учинчи марта беш йиллик муддатга Бош котиб этиб сайлади. Овоз бериш Хитой Коммунистик партияси 20-Марказий қўмитасининг биринчи пленумида бўлиб ўтди. ХХР раиси Си Цзиньпин давлат раҳбари ва Хитой халқ республикаси Марказий ҳарбий кенгаши раиси лавозимларини сақлаб қолиши кутилмоқда.

Си Цзиньпиндан олдинги президентлар мамлакатни икки беш йиллик муддатга бошқарган. Бироқ 2018 йилда конституцияга ўзгартириш киритилиб, мамлакатни чексиз муддатга бошқаришга рухсат берилди.