Rossiya armiyasi bosib olingan Xerson viloyatining g‘arbiy qismidan o‘z kuchlarini olib chiqishni boshladi. Bu haqda Amerikaning Urushni tadqiq qilish instituti (Institute for the Study of War — Amerikaning mudofaa va xalqaro masalalar sohasida tadqiqotlar olib boruvchi nohukumat tashkiloti, u Rossiya Ukrainaga bostirib kirganidan buyon frontdagi holatni tahlil qilib boradi) xabar berdi.
ISW tahlilchilari Ukraina armiyasi xabarlariga tayanmoqda, ular avvalroq Rossiya kuchlari o‘q-dorilar, texnika va ba’zi bo‘linmalarni Dneprning g‘arbiy qirg‘og‘idan sharqiy qirg‘og‘iga “ancha faol ravishda” olib o‘tayotganini va front chizig‘ini ushlab turish uchun qariyb 2 ming nafar safarbar etilganlarni yo‘naltirgani, bu orqali, katta ehtimol bilan, qo‘shinlar chekinayotganini bekitishga urinayotganini ma’lum qilgandi.
Ayni vaqtda ISW hisobotida ta’kidlanishicha, mudofaani ushlab turgan va boshqa kuchlar olib ketilganini yashirib turgan otryad tayyorgarlikdan o‘tgan va professional bo‘lishi kerak. “Yaxshi tayyorgarlikdan o‘tmagan, yaqinda safarbar etilgan rossiyalik zaxiradagi askarlar, Ukraina kuchlari ularga hujumga o‘tishga va chekinayotgan kuchlarni ta’qib etishga qaror qilgan taqdirda, Ukraina hujumiga turib berishi va qarshilik ko‘rsatishi ehtimoli kam”, — deb yozadi ISW.
Bundan tashqari, Urushni tadqiq qilish instituti Rossiya chekinayotganini yashirish va Ukraina qo‘shinlarining Rossiya kuchlarini Xerson viloyati ichkarisigacha ta’qib qilishiga yo‘l qo‘ymaslik uchun viloyatdagi Kaxov GES dambasini portlatib yubormoqchi ekani haqidagi prognozini yana takrorladi. Dambaga zarar yetkazish bo‘yicha javobgarlikni Rossiya Ukraina zimmasiga yuklamoqchi.
“Ukraina o‘zining 80 ta shahrini suv ostida qoldirib, yuz minglab odamlarning ko‘chirilishiga olib kelishi mumkin bo‘lgan, shundoq ham zaif bo‘lgan energiya ta’minotiga zarar yetkazadigan to‘g‘on portlatilishidan moddiy manfaatdor emas”, — deyiladi ISW ma’ruzasida.
19-oktabr kuni Vladimir Putin Ukrainaning rasman bosib olingan hududlarida, shu jumladan, Xerson viloyatida harbiy holat e’lon qildi. O‘sha kuniyoq u yerda evakuatsiya boshlandi.
20-oktabr kuni Rossiya Mudofaa vazirligi Ukraina qurolli kuchlari Xerson viloyati va Donbassga hujum boshlaganini ma’lum qildi. Undan sal avvalroq Ukrainaga hujumning yangi qo‘mondoni Sergey Surovikin “Xerson yo‘nalishida vaziyat qiyin” ekanini va u “murakkab qarorlar qabul qilinishi”ni istisno etmayotganini aytgandi.
Izoh (0)