Россия қўшинлари Украинанинг Ивано-Франковск шаҳридаги ИЭСга ракета ҳужумларини уюштиргани ҳақида хабар берилганди. Зеленский рус қўшинларининг муҳим объектлар, жумладан, энергетика тизими объектларига берган зарбалари ҳақида ўзининг Telegram’даги каналида пост қолдирди.
«Босқинчилар мамлакатимизни террор қилишда давом этмоқда. Кечаси душман катта ҳужумни амалга оширди: 36 та ракета, уларнинг аксарияти уриб туширилди. Барча ҳаво ҳужумидан мудофаа хизматларига қилган меҳнатлари учун раҳмат айтаман. Ҳозирги вақтда зарбалар таъсир ўтказган жойларда ишлаётган ва инфратузилмамизни тиклаётган барча энергетика ходимларига раҳмат. Сизлар бизнинг қаҳрамонимизсиз!
Фотосурат душман бизни қандай қилиб енгишга уринаётганига мисоллардан биридир. Бу муҳим аҳамиятга эга объектларга даҳшатли зарбалардир. Террористларга хос тактика. Дунё бу террорни тўхтата олади ва тўхтатиши ҳам керак», — дейди президент.
Маълумот ўрнида, Россия Украинанинг муҳим инфратузилмасига ҳужум қилишни тўхтатмаяпти. Хусусан, 19 октябрь, чоршанба куни улар Ивано-Франковск вилоятидаги Бурштин иссиқлик электр станциясига ракета ҳужумларини уюштирган.
«Бугун вилоятимиз яна ракета ҳужумларига учради. Бурштин ИЭСга берилган зарба натижасида ёнғин содир бўлди. Барча хизматлар ишламоқда, қутқарувчилар воқеа жойида. Худога шукур, қурбонлар йўқ», — деди Ивано-Франковск вилояти давлат маъмурияти раиси Светлана Онисчук Telegram’даги видеомурожаатида.Онисчукнинг эслатишича, Буртишнская ИЭС ҳудудидаги йўл тўсиб қўйилган, қўшни қишлоқлар орқали айланма йўл ташкил этилган. Маъмурият раҳбари, шунингдек, аввалроқ фуқароларнинг электр энергиясини тежаш бўйича мутасаддиларнинг чақириғига жавобан вилоятда электр энергияси истеъмоли даражасини 15 фоизга камайтиришга эришилганини ҳам таъкидлаган.
«Электр энергиясини тежашда давом этишимиз зарур. Мен ҳаммадан соат 17:00 дан 23:00 гача кўп энергия сарфлайдиган электр жиҳозларидан камроқ фойдаланишни сўрайман», — дея таъкидлади у.
Изоҳ (0)