Rossiyada safarbar etilganlarning qariyb 10 ming nafari uylariga qaytarilgan. Bu haqda Rossiya Davlat dumasining mudofaa qo‘mitasi raisi Andrey Kartapolov ma’lum qildi, deb yozadi “TASS”.
“Bugungi kunda qariyb 10 ming kishi turli sabablar bilan qaytarilgan”, — dedi u Sankt-Peterburgda ko‘ngillilar bilan uchrashuv chog‘ida yanglish ravishda safarbar qilinganlar haqidagi savolga javob berar ekan.
Rossiyada qisman safarbarlik 21-sentabr kuni e’lon qilindi va 300 ming kishi armiyaga chaqilishi ma’lum qilindi. 14-oktabr kuni allaqachon 222 ming safarbar etilgani haqida xabar berildi.
Rossiya Mudofaa vazirligi ma’lumotlariga ko‘ra, armiyaga 35 yoshgacha bo‘lgan oddiy askarlar va serjantlar, 50 yoshgacha bo‘lgan kichik va 55 yoshgacha bo‘lgan katta ofitserlar chaqiriladi. Talabalar, ko‘p farzandli otalar, salomatligi jihatidan yaroqsiz bo‘lganlar, oila a’zosini doimiy parvarish qilish bilan band bo‘lganlarning armiyaga chaqirilish muddati ortga surildi.
Ba’zi toifadagi IT-mutaxassislar, axborot va aloqa sohasida tizimni yuzaga keltiruvchi korxonalar xodimlari, shuningdek, to‘lov tizimi va moliya bozori barqarorligini ta’minlovchi tashkilotlarda ishlovchilar ham safarbarlikdan ozod etildi.
Safarbarlik tadbirlari boshlanishi bilan Rossiyaning bir qator hududlari ma’muriyatlari safarbarlik kampaniyasi doirasida yo‘l qo‘yilgan xatoliklar, shu jumladan, safarbarlikdan ozod etilgan fuqarolar harbiy xizmatga chaqirilayotgani haqida xabarlar bergan. Shundan keyin Rossiya prezidenti Vladimir Putin “barcha xatolarni tuzatish va ularni boshqa takrorlamaslik”ni talab qildi. “Agar xatolik yuz bergan bo‘lsa, uni tuzatish kerak, tegishli asoslar bo‘lmagan holda chaqirilganlar uyga qaytarilsin”, — dedi u.
Shundan keyin bir qator hududlarda harbiy komissariatlar qoshida safarbarlik chog‘idagi xatoliklar haqida murojaatlarni qabul qiluvchi maxsus ishchi guruhlar tuzildi. Shuningdek, bunday murojaatlarni Umumrossiya xalq frontining mintaqaviy bo‘linmalariga ham berish mumkin.
Izoh (0)