Bayden AQSHning Ukrainaga moliyaviy yordamini qisqartirmoqchi bo‘layotgan respublikachilarni keskin tanqid qildi

AQSH prezidenti Jo Bayden respublikachilar Kongressga noyabr oyidagi oraliq saylovlarda g‘olib chiqqan taqdirda, Ukrainaga qo‘shimcha moliyaviy yordamni bloklab qo‘yishidan xavotir bildirdi. Bu haqda u Pitsburgda demokratlar qurultoyida ma’lum qildi, deb yozadi “RBK”.

“Men Ukrainaga ko‘mak hajmi qisqartirilishidan xavotirdaman, chunki respublikachilar uni kamaytirishlarini aytgandi”, — dedi Bayden jurnalistning tegishli savoliga javob berar ekan. “Ularda Amerika tashqi siyosati bo‘yicha hech qanaqa tushuncha yo‘q”, — deya qo‘shib qo‘ydi u.

Prezident shu tariqa Respublikachilar partiyasining vakillar palatasidagi yetkachisi Kevin Makkartining bayonotiga javob qildi, u iqtisodiy muammolar tufayli Vashington Ukrainaga avvalgi hajmlarda yordam taqdim etishga qiynalishini aytgandi. “Fikrimcha, odamlar retsessiya sharoitida o‘tirgan bir paytda Ukrainaga kart-blansh yozib bermaydi”, — degan edi u.

Makkartining bayonotiga Ukraina vakillari ham munosabat bildirdi va bundan “shok holatiga tushgani”ni ma’lum qildi: “Bor-yo‘g‘i bir necha hafta avval delegatsiyamiz AQSHga tashrif buyurgan va Makkarti bilan uchrashgandi. ‘Xalq xizmatchisi’ prezident partiyasi rahbari David Araxamiya Ukraina tomonini Kiyevga ikkita partiya tomonidan ham ko‘mak berilishi ustuvor vazifa bo‘lib qolishiga ishontirishganini aytgandi”.

Avvalroq AQSH Mudofaa vaziri Lloyd Ostin urush boshlangandan beri Amerikaning Ukrainaga bergan harbiy yordamining umumiy miqdori 16,8 milliard dollarga yetganini ma’lum qilgan edi.