Байден АҚШнинг Украинага молиявий ёрдамини қисқартирмоқчи бўлаётган республикачиларни кескин танқид қилди

АҚШ президенти Жо Байден республикачилар Конгрессга ноябрь ойидаги оралиқ сайловларда ғолиб чиққан тақдирда, Украинага қўшимча молиявий ёрдамни блоклаб қўйишидан хавотир билдирди. Бу ҳақда у Пицбургда демократлар қурултойида маълум қилди, деб ёзади «РБК».

«Мен Украинага кўмак ҳажми қисқартирилишидан хавотирдаман, чунки республикачилар уни камайтиришларини айтганди», — деди Байден журналистнинг тегишли саволига жавоб берар экан. «Уларда Америка ташқи сиёсати бўйича ҳеч қанақа тушунча йўқ», — дея қўшиб қўйди у.

Президент шу тариқа Республикачилар партиясининг вакиллар палатасидаги еткачиси Кевин Маккартининг баёнотига жавоб қилди, у иқтисодий муаммолар туфайли Вашингтон Украинага аввалги ҳажмларда ёрдам тақдим этишга қийналишини айтганди. «Фикримча, одамлар рецессия шароитида ўтирган бир пайтда Украинага карт-бланш ёзиб бермайди», — деган эди у.

Маккартининг баёнотига Украина вакиллари ҳам муносабат билдирди ва бундан «шок ҳолатига тушгани»ни маълум қилди: «Бор-йўғи бир неча ҳафта аввал делегациямиз АҚШга ташриф буюрган ва Маккарти билан учрашганди. ‘Халқ хизматчиси’ президент партияси раҳбари Давид Арахамия Украина томонини Киевга иккита партия томонидан ҳам кўмак берилиши устувор вазифа бўлиб қолишига ишонтиришганини айтганди».

Аввалроқ АҚШ Мудофаа вазири Ллойд Остин уруш бошлангандан бери Американинг Украинага берган ҳарбий ёрдамининг умумий миқдори 16,8 миллиард долларга етганини маълум қилган эди.