Tadbirkor va investor Ruben Vardanyan Arsax (tan olinmagan Tog‘li Qorabog‘ respublikasining armancha nomlanishi) hukumati rahbari lavozimini egallashga rozilik berganini ma’lum qildi. Bunday taklif bilan unga oktabr boshida Tog‘li Qorabog‘ prezidenti Araik Arutyunyan murojaat qilgan edi.
“Noyabr boshida Arsax davlat vaziri lavozimiga rasman kirishaman va shunda bizning strategik maqsadlarimiz va birlamchi vazifalarimizni bayon qilaman, shuningdek, biz tashlaydigan ilk qadamlarimiz haqida ma’lum qilaman”, — deb yozdi tadbirkor o‘z Telegram-kanalida.
Sentabr boshida rossiyalik va armanistonlik tadbirkor va investor Ruben Vardanyan tan olinmagan Tog‘li Qorabog‘ Respublikasiga ko‘chib o‘tganini ma’lum qilgan edi. “Qanday risklarni o‘z zimmamga olayotganimni tushungan holda, Rossiya fuqaroligidan voz kechib, Armaniston fuqarosi sifatida Arsaxga ko‘chib o‘tishga qaror qildim. Bu qarorni qabul qilish men uchun oson bo‘lmadi, ammo to‘g‘ri ish tutdim”, — degan edi Vardanyan.
Tadbirkor, shuningdek, tan olinmagan Tog‘li Qorabog‘ respublikasini rivojlantirish bilan shug‘ullanuvchi “Xavfsizlik va Arsaxni rivojlantirish fronti” tuzilgani haqida ham gapirib bergandi.
Ruben Vardanyan — “Troyka Dialog” investitsion kompaniyasining sobiq egasi, “Skolkovo” biznes-maktabi asoschisi. 2021-yilda Forbes jurnali uning boyligini bir milliard dollarga baholagan, u Rossiyaning 200 nafar eng boy odamlari ro‘yxatida 116-o‘rinni egallagan edi.
2022-yil sentabri o‘rtalarida Armaniston va Ozarbayjon chegarasida jangovar harakatlar qayta boshlandi. Nizo tomonlari vaziyatni keskinlashtirishda bir-birini aybladi. Rasmiy ma’lumotlarga ko‘ra, o‘shanda 200 dan ortiq odam halok bo‘lgan. Turli darajadagi to‘qnashuvlar oktabrda ham davom etmoqda.
Izoh (0)