Тадбиркор ва инвестор Рубен Варданян Арцах (тан олинмаган Тоғли Қорабоғ республикасининг арманча номланиши) ҳукумати раҳбари лавозимини эгаллашга розилик берганини маълум қилди. Бундай таклиф билан унга октябрь бошида Тоғли Қорабоғ президенти Араик Арутюнян мурожаат қилган эди.
«Ноябрь бошида Арцах давлат вазири лавозимига расман киришаман ва шунда бизнинг стратегик мақсадларимиз ва бирламчи вазифаларимизни баён қиламан, шунингдек, биз ташлайдиган илк қадамларимиз ҳақида маълум қиламан», — деб ёзди тадбиркор ўз Telegram-каналида.
Сентябрь бошида россиялик ва арманистонлик тадбиркор ва инвестор Рубен Варданян тан олинмаган Тоғли Қорабоғ Республикасига кўчиб ўтганини маълум қилган эди. «Қандай рискларни ўз зиммамга олаётганимни тушунган ҳолда, Россия фуқаролигидан воз кечиб, Арманистон фуқароси сифатида Арцахга кўчиб ўтишга қарор қилдим. Бу қарорни қабул қилиш мен учун осон бўлмади, аммо тўғри иш тутдим», — деган эди Варданян.
Тадбиркор, шунингдек, тан олинмаган Тоғли Қорабоғ республикасини ривожлантириш билан шуғулланувчи «Хавфсизлик ва Арцахни ривожлантириш фронти» тузилгани ҳақида ҳам гапириб берганди.
Рубен Варданян — «Тройка Диалог» инвестицион компаниясининг собиқ эгаси, «Сколково» бизнес-мактаби асосчиси. 2021 йилда Forbes журнали унинг бойлигини бир миллиард долларга баҳолаган, у Россиянинг 200 нафар энг бой одамлари рўйхатида 116-ўринни эгаллаган эди.
2022 йил сентябри ўрталарида Арманистон ва Озарбайжон чегарасида жанговар ҳаракатлар қайта бошланди. Низо томонлари вазиятни кескинлаштиришда бир-бирини айблади. Расмий маълумотларга кўра, ўшанда 200 дан ортиқ одам ҳалок бўлган. Турли даражадаги тўқнашувлар октябрда ҳам давом этмоқда.
Изоҳ (0)