Toshkent viloyatining Qibray va Buxoro viloyatining Buxoro tumanlarida yer maydonlari savdosi bilan bog‘liq firibgarlik holatlari fosh etildi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Qibray tuman bo‘limi tomonidan IIV xodimlari bilan hamkorlikda tezkor tadbir o‘tkazilgan. Unda fuqaro B.T. fuqaro N.ning ishonchiga kirib, unga go‘yoki O‘rta Chirchiq tumani qurilish bo‘limida ishlovchi tanishlari orqali “Istiqlol” MFY hududidagi 90 gektar yer maydonini auksion orqali 49 yil muddatga foydalanish uchun yutib berish evaziga 30 000 dollarni olgan vaqtida ashyoviy dalillar bilan ushlangan.
Shuningdek, departamentning Buxoro viloyat boshqarmasi tomonidan IIB xodimlari bilan hamkorlikda tezkor tadbir o‘tkazilgan. Unda fuqaro Z.S. boshqa bir fuqaro S.ning ishonchiga kirib, Buxoro tumani “Kulonxona” MFY hududidagi o‘zi noqonuniy foydalanib kelgan zaxiradagi 8 sotix yer maydonini tanishlari yordamida uning nomiga rasmiylashtirib berishini aytib, evaziga 7 500 AQSH dollarini olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilgan. Hozirda tergov harakatlari o‘tkazilmoqda.
Izoh (0)