Marg‘ilon shahrida “Atlas bayrami” V xalqaro an’anaviy to‘qimachilik festivalining tantanali ochilish marosimi bo‘lib o‘tdi. Bu haqda “Daryo” muxbiri Azizjon Ermatov xabar bermoqda.
Qayd etilishicha, festival Turizm va madaniy meros vazirligi, Farg‘ona viloyati hokimligi, YUNESKOning O‘zbekistondagi vakolatxonasi, respublika “Hunarmand” uyushmasi va boshqa tashkilotlar tashabbusi bilan o‘tkazilmoqda.
Festivalda dunyoning 21 ta davlatidan 90 ga yaqin mohir dizaynerlar, taniqli madaniyat arboblari, san’atshunos olimlar, mahalliy va xorijiy ommaviy axborot vositalari vakillari ishtirok etmoqda.
Festivalda Marg‘ilon ipakchiligini keng targ‘ib etish, milliy matolardan foydalangan holda liboslar dizaynini yaratish va an’anaviy hunarmandchilikni rivojlantirish, atlas va adraslarga bezak berish, ipak matolarga naqsh va gullar bosish, o‘tgan asrlarda yurtimizda mashhur bo‘lgan gazlamalar tarixini o‘rganish masalalariga e’tibor qaratiladi.
Festival oldidan 16—19-oktabr kunlari Qo‘shtepa tumanidagi Hunarmandlar markazida taniqli ustalar ishtirokida an’anaviy hunarmandchilik hamda liboslar dizayni bo‘yicha mahorat darslari bo‘lib o‘tdi.
Festival doirasida “Zamonaviy dunyoda an’anaviy to‘qimachilikning o‘rni” xalqaro konferensiyasi, “Buyuk ipak yo‘li vorislari” an’anaviy to‘qimachilik mahsulotlari ko‘rgazmasi, “Ikat mahsulotlarini ishlab chiqilishi va eksporti sohasidagi muvaffaqiyatlar va to‘siqlar” mavzusida davra suhbati o‘tkazilishi ko‘zda tutilgan.
Bayramda to‘qimachilik va amaliy san’at buyumlari yarmarkasi, xalq sayli, askiya va katta ashula ijrochiligi, folklor ansambllari, xalq ijrochilarining dasturlari, konsertlar, kurash musobaqasi, dorbozlar va qo‘g‘irchoq teatrlari tomoshalari ham namoyish etiladi.
Festival 22-oktabrga qadar davom etadi. Asosiy tadbirlar Marg‘ilon shahridagi ijodkorlar bog‘ida bo‘lib o‘tmoqda.
Izoh (0)