Toshkent shahri Chilonzor tumanida haydovchilik guvohnomasini olib berishni va’da qilgan xususiy korxona rahbari va o‘rinbosari ushlandi. Bu haqda Iqtisodiy jinoyatlarga qarshi kurashish departamenti xabar berdi.
Bosh prokuratura huzuridagi departamentning Chilonzor tumani bo‘limi tomonidan DXX va IIV xodimlari bilan hamkorlikda tezkor tadbir o‘tkazilgan. Unda “A.V.” xususiy korxonasi rahbari o‘rinbosari Sh.Q. fuqaro A.K.ni ushbu korxonada haydovchilik guvohnomasini olish uchun o‘quv kursini tugatgandan so‘ng YXHBda o‘tadigan imtihondan o‘tkazib berish evaziga 600 dollarni olgan vaqtida ushlangan. Uning ko‘rsatuviga asosan davom etgan tadbirda “Z.B.” XK rahbari G.Yu. Sh.Q.dan 500 dollar olgan vaqtida daliliy ashyolar bilan ushlangan.
Mazkur holat yuzasidan Jinoyat kodeksining 28, 192-9-moddasi (tijoratda pora evaziga og‘dirib olish) va 168-moddasi (firibgarlik) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)