Қашқадарё вилоятининг Ғузор туманида 57 ёшли шифокор хизмат бурчини бажараётган пайтида калтакланди. Бу ҳақда вилоят соғлиқни сақлаш бошқармаси матбуот хизмати хабар берди.
Қайд этилишича, калтакланган шифокор Т.Ҳ. 32 йилдан буён Ғузор тумани тиббиёт бирлашмасида анестезиолог-реаниматолог бўлиб ишлайди. Айни пайтда туманда яқинда очилган туманлараро қўшма шикастланиш ва ўткир қон томир касалликлари марказида фаолият юритмоқда.
14 октябрь куни унинг одатдаги навбатчилик кунларидан бирида кечқурун бўлимга 1970 йилда туғилган бемор олиб келинган. Унга гипертония ташхиси қўйилиб, тезкор тиббий ёрдамга киришилган. Соат 21:00 лар атрофида даво муолажалари давом этаётган пайтда жараёнга халақит бераётган беморнинг 25 ёшлар атрофидаги ўғли ва шифокор ўртасида келишмовчилик келиб чиққан. Оқибатда беморнинг ўғли шифокорга мушт кўтарган.
Тўлқин Ҳамроев «калла ва бош мия шикастланиши, бош мия чайқалиши, бурун суягининг очиқ синиши, бурун асоси эзилиб, йиртилган жароҳати, юқори жағ ўнгдан қозиқ тишнинг травматик синиши, иккала қовоқ-бурун асоси гематомалари» ташхиси билан травматология бўлимига ётқизилган.
Воқеа юзасидан терговга қадар текширув ҳаракатлари олиб борилмоқда. Вилоят соғлиқни сақлаш бошқармаси мазкур ҳолатни ўз назоратига олган.
Бундан аввал Тошкентда 13 ва 16 октябрь кунлари тез ёрдам ходимлари калтакланганди.
Изоҳ (0)