2022-yil uchun O‘zbekiston YIMning prognoz qilingan real o‘sish sur’atlarini yangilandi. Bu haqda “Daryo”ga Iqtisodiy tadqiqotlar va islohotlar markazi xabar bermoqda.
2022-yilning uchinchi choragida haftalik YIM dinamikasining o‘sish tendensiyasi davom etib kelmoqda. Bunday holat joriy yilning ikkinchi choragida ham kuzatilgandi.
2022-yil 3—4-choraklarida o‘sish tendensiyasining ortib borishi 1-yarim yillik ko‘rsatkichlariga nisbatan yillik hisobda YIMning kamida 0,75 foizga oshishiga olib kelishi kutilmoqda.
1-chorakdagi sezilarli pasayishdan keyin iqtisodiyotning tiklanishi tashqi savdo aylanmasi hajmining o‘sishi, xizmat ko‘rsatish sohasida ishbilarmonlik faolligi va davlat yordamining oshganligi bilan bog‘liq.
Xususan, tovar va xizmatlar tashqi savdo aylanmasi avgust va sentyabr oylarida mos ravishda 14 foiz va 12 foizga oshdi.
Xizmat ko‘rsatish sohasida ham faollik sezilarli darajada oshdi, buni “biznes va sanoat” (14,5 foizga o‘sish) va “dam olish va hordiq” (9,7 foiz) kabi toifalar bo‘yicha internet so‘rovlari ko‘paygani ko‘rsatmoqda.
Yuqoridagi omillarni hisobga olgan holda, 3-chorak yakuni bo‘yicha YIM o‘sish prognozi 5,81 foizni tashkil etmoqda (prognoz diapazoni 5,78—5,83 foiz darajasida belgilandi).
Shu bilan birga, markaz prognoziga ko‘ra, qisqa muddatda iqtisodiy o‘sishda sezilarli tebranishlar kutilmayapti, chunki fundamental iqtisodiy omillar barqarorligicha qolmoqda.
4-chorakda O‘zbekiston iqtisodiyotining o‘sish sur’atlari 2022-yilning 3-choragi darajasida saqlanib qolishi kutilmoqda. Joriy yilning avgust oyida 2022-yil uchun markaz tomonidan e’lon qilingan avvalgi YIM o‘sishi prognozi 5,77 foiz edi.
Izoh (0)