Qozog‘istonga kirib kelayotgan rossiyaliklar soni kamaygani ma’lum qilindi

Qozog‘istonda Rossiyadan kirib kelayotgan odamlar soni qisqardi, deya ma’lum qildi mamlakat ichki ishlar vaziri Marat Axmetjanov.

“Biz avvalgi darajaga tushdik: Rossiyadan kirib kelayotganlar soni chiqayotganlar sonidan kamroq. Bir kecha-kunduzda 8—9 ming rossiyalik kirib kelyapti, 10—11 ming Rossiya fuqarolari chiqib ketyapti. Bu ko‘rsatkichlari xuddi avvalgidek, ular o‘z me’yoriga qaytdi”, — dedi Axmetjanov jurnalistlarga.

Eslatib o‘tamiz, Rossiyada 21-sentabr kuni safarbarlik e’lon qilinganidan keyin Gruziya, Qozog‘iston, Finlyandiya bilan chegaralarda harbiy xizmatga chaqirilishdan xavfsirab, mamlakatni tark etayotgan rossiyaliklardan iborat katta navbatlar va avtomobil tirbandliklari yuzaga keldi. Juda ko‘p sonli rossiyaliklar Qozog‘iston hududiga o‘tdi.

Oktabr boshlariga kelib, Qozog‘iston OAVlari mamlakatning Rossiya bilan chegara o‘tish joylarida ko‘p kilometrlik navbatlar barham topib, vaziyat normal holatga qaytayotganini ma’lum qildi.

Qozog‘iston Ichki ishlar vazirligi rahbari Marat Axmetjanov oktabr boshi holatiga, Rossiyada “qisman safarbarlik” e’lon qilinganidan keyin Qozog‘istonga 200 mingdan ortiq rossiyalik kelganini aytgandi.

Qozog‘iston prezidenti Qosim-Jo‘mart To‘qayev Rossiya fuqarolarining respublikaga ommaviy kelishi fonida Moskva bilan muzokaralar olib bormoqchiligini ma’lum qilgandi. Qozog‘iston Ichki ishlar vazirligi rahbari safarbarlikdan bo‘yin tovlayotgan fuqarolar xalqaro qidiruvga berilmasa, ularni Rossiyaga ekstraditsiya qilmaslikka va’da bergan.