Қозоғистонга кириб келаётган россияликлар сони камайгани маълум қилинди

Қозоғистонда Россиядан кириб келаётган одамлар сони қисқарди, дея маълум қилди мамлакат ички ишлар вазири Марат Ахметжанов.

«Биз аввалги даражага тушдик: Россиядан кириб келаётганлар сони чиқаётганлар сонидан камроқ. Бир кеча-кундузда 8—9 минг россиялик кириб келяпти, 10—11 минг Россия фуқаролари чиқиб кетяпти. Бу кўрсаткичлари худди аввалгидек, улар ўз меъёрига қайтди», — деди Ахметжанов журналистларга.

Эслатиб ўтамиз, Россияда 21 сентябрь куни сафарбарлик эълон қилинганидан кейин Грузия, Қозоғистон, Финляндия билан чегараларда ҳарбий хизматга чақирилишдан хавфсираб, мамлакатни тарк этаётган россияликлардан иборат катта навбатлар ва автомобиль тирбандликлари юзага келди. Жуда кўп сонли россияликлар Қозоғистон ҳудудига ўтди.

Октябрь бошларига келиб, Қозоғистон ОАВлари мамлакатнинг Россия билан чегара ўтиш жойларида кўп километрлик навбатлар барҳам топиб, вазият нормал ҳолатга қайтаётганини маълум қилди.

Қозоғистон Ички ишлар вазирлиги раҳбари Марат Ахметжанов октябрь боши ҳолатига, Россияда «қисман сафарбарлик» эълон қилинганидан кейин Қозоғистонга 200 мингдан ортиқ россиялик келганини айтганди.

Қозоғистон президенти Қосим-Жўмарт Тўқаев Россия фуқароларининг республикага оммавий келиши фонида Москва билан музокаралар олиб бормоқчилигини маълум қилганди. Қозоғистон Ички ишлар вазирлиги раҳбари сафарбарликдан бўйин товлаётган фуқаролар халқаро қидирувга берилмаса, уларни Россияга экстрадиция қилмасликка ваъда берган.