Yevropa Ittifoqi mamlakatlari tashqi ishlar vazirlari Ukrainaga 500 million yevro miqdoridagi oltinchi harbiy yordam paketini taqdim etishni ma’qulladi. Shuningdek, ular Ukraina harbiylari uchun o‘quv missiyasini boshlashga kelishib oldi. Shu tariqa YIdan Ukrainaga berilayotgan harbiy yordamning umumiy miqdori 3,1 milliard yevroga yetadi.
YI Kengashining press-relizida aytilishicha, 490 million yevro harbiy texnikaga sarflanadi, yana 10 million yevro zarur jihozlar, shaxsiy himoya vositalari, birinchi tibbiy yordam qutilari va yonilg‘i xarajatlarini qoplashga mo‘ljallangan. Yevropa diplomatiyasi rahbari Jozep Borrel “Yevropa Ittifoqi Ukrainani zarurat tug‘ilganda qo‘llab-quvvatlashda davom etadi”, deb va’da berdi.
Ukraina harbiylarini tayyorlash bo‘yicha Yevropa Ittifoqi missiyasi ikki yil davom etadi. Taxminiy xarajatlar 106,7 million yevroga baholanmoqda.
“Missiya YIga a’zo davlatlarning Ukrainani qo‘llab-quvvatlash bo‘yicha ikki tomonlama faoliyati, shuningdek, boshqa hamfikr xalqaro hamkorlar bilan muvofiqlashtirishni ta’minlaydi va uchinchi davlatlarning ishtiroki uchun ochiq bo‘ladi”, — deb tushuntirdi Yevropa Ittifoqi kengashi.
Borrel Ukrainaga 500 million yevro Yevropa tinchlik fondi hisobidan ajratilishini aytgan edi. O‘quv missiyasi Yevropa Ittifoqida noyabr oyining o‘rtalaridan boshlab ishga tushadi, 15 mingga yaqin ukrainalik askarni tayyorlash rejalashtirilgan. Trening xodimlari Polshaga kelib joylashadi.
Financial Times’ning yozishicha, Ukraina YIdan yanada “barqaror va oldindan aytib bo‘ladigan” moliyaviy yordam talab qilmoqda. Kiyev 2023-yilda xalqaro hamkorlaridan budjet yordami sifatida 38 milliard dollar yoki oyiga taxminan 3,5 milliard dollar olishni kutmoqda. Politico ma’lumotlariga ko‘ra, Yevropa Ittifoqida Ukrainaga qurol yetkazib berish xarajatlarini qoplash uchun mablag‘ yetishmayapti.
Izoh (0)