Ижтимоий тармоқларда «Нишонлик мактаб ўқувчилари пахта теримига жалб этилди» мазмунидаги мурожаат эълон қилинганди. Ҳолат юзасидан Қашқадарё вилояти халқ таълими бошқармаси муносабат билдирди.
Қайд этилишича, мурожаат вилоят халқ таълими бошқармаси, Нишон тумани ҳокимлиги болаларни ҳимоя қилиш шўъбаси ҳамда ҳуқуқни муҳофаза қилувчи орган ходимлари иштирокида атрофлича ўрганилди. Маълум бўлишича, 15 октябрь куни 109-сонли отряд раҳбари С.Н. бошчилигидаги 80 нафар теримчи Нишон тумани «Ойдин» маҳалласи ҳудудидаги «Уч ботир» фермер хўжалиги дала майдонида теримда иштирок этган.
Шу куни соат 15:00 да теримчи Д.Э. соғлигида юзага келган ўзгариш сабабли аҳволи ёмонлашган ва оила аъзоларига қўнғироқ қилиб (фарзандига), доимий равишда истеъмол қилиб келган «Цитрамон» ва «Эринит» дори-дармонларини етказиб беришларини сўраган. Зарур дорилар теримчи Д.Э.нинг вояга етмаган фарзанди У.Н. (2009 йилда туғилган) томонидан дала майдонига олиб келиниб, ёрдам кўрсатилган.
Шунингдек, теримчи З.Ж.нинг илтимосига кўра вояга етмаган фарзанди О.Н. (2007 йилда туғилган) томонидан зарур бўлган маҳсулотлар етказиб берилган. Ўрганишда вояга етмаган У.Н. Нишон туманидаги ихтисослаштирилган мактабнинг 7-синфида ва вояга етмаган О.Н. Нишон туман халқ таълими бўлимига қарашли 18-сонли умумтаълим мактабнинг 9-синфида таълим олиб келаётгани ва 15 октябрь куни соат 12:30 га қадар дарс машғулотларида тўлиқ иштирок этгани аниқланган.
Тармоқларда ёритилган қўшимча фототасвирда эса фермер хўжалиги раҳбари А.Э.нинг 2 нафар боғча ёшидаги вояга етмаган набираси оила аъзолари билан биргаликда дала майдонига келганликлари аниқланган (пахта теримига жалб қилинмаган). Ўрганиш якунига кўра, ижтимоий тармоқларда ёритилган мақоладаги ҳолатлар ўз тасдиғини топмаганини маълум қиламиз, — дейилади муносабатда.
Изоҳ (0)