O‘zbekiston va Vengriya investorlari ishtirokida qo‘shma aviatashuvchi kompaniyani yaratilishi mumkin. Bu haqda bosh vazir o‘rinbosari — investitsiyalar va tashqi savdo vaziri Jamshid Xo‘jayev va Vengriya iqtisodiy rivojlanish vaziri Marton Nadji ishtirokida bo‘lib o‘tgan muzokaralarda ma’lum bo‘ldi.
Vazirlik matbuot xizmatining ma’lum qilishicha, 17-oktabr kuni videokonferensaloqa tarzida o‘tgan muzokaralarda tomonlar amaldagi kelishuvlarni hayotga tatbiq etishning amaliy jihatlarini muhokama qildi. O‘zbekiston va Vengriya o‘rtasida umumiy qiymati 1,2 milliard dollarlik 42 ta hujjatni jadal ijro etish bo‘yicha chora-tadbirlarni tahlil qilish va ishlab chiqishga alohida e’tibor qaratdi.
Qishloq xo‘jaligi, avtomobilsozlik, farmatsevtika, bank-moliya, transport va logistika sohalarida, shuningdek, suv xo‘jaligi jarayonlarini raqamlashtirish sohasida qo‘shma investitsiyaviy loyihalarni amalga oshirish borasida hamkorlik qilish istiqbollari ko‘rib chiqildi.
Xususan, Vengriyaning Bona Farm, Master Good va Kite kompaniyalari vakillarining parrandachilik klasterlarini tashkil etish, intensiv bog‘dorchilik va meva-sabzavotlarni qayta ishlash, RABA va Joison Safety Systems kompaniyalari xodimlarining avtomobilsozlik sanoati uchun butlovchi qismlarni yetkazib berishni tashkil etish, Meditop, Femfelgozzo, Gideon Rixter kompaniyalari innovatsion dori vositalari, tibbiy mebellar va tibbiy asbob-uskunalar ishlab chiqarish uchun yuqori texnologiyali farmatsevtika korxonalarini yaratish kabi loyihalarini batafsil o‘rganish maqsadida tashriflarini tashkil etish bo‘yicha kelishuvga erishildi.
Bank-moliya sohasidagi hamkorlik istiqbollarini muhokama qilib, tomonlar O‘zbekiston—Vengriya qo‘shma investitsiya jamg‘armasini yaratish imkoniyatlarini ko‘rib chiqdi, shuningdek, OTP Group bilan loyihani amalga oshirishni faollashtirishga kelishib oldi.
Transport-logistika sohasida ikki tomonlama hamkorlikning jihatlari alohida ko‘rib chiqildi. Tomonlar Wiz Air aviakompaniyasi bilan Samarqand—Abu-Dabi to‘g‘ridan to‘g‘ri reyslari muvaffaqiyatli yo‘lga qo‘yilganini olqishladi va o‘zbekistonlik investorlar ishtirokida qo‘shma aviatashuvchi kompaniyani yaratish masalasini muhokama qildi. Havo qatnovi to‘g‘risidagi hukumatlararo bitimni imzolashni tezlashtirishga kelishildi.
Muzokaralar yakunlari bo‘yicha tomonlar hamkorlikning muhokama qilingan yo‘nalishlarini amalga oshirish maqsadida “yo‘l xaritalari” va dasturlarini bajarish bo‘yicha qo‘shma ishlarni davom ettirish va aniq amaliy choralar ko‘rishga sodiqligini bildirdi.
Izoh (0)