Toshkent shaharidagi 6 gektar yer maydonida joylashgan sobiq Astronomiya parki o‘rnida yangi bog‘ quriladi. Bu haqda Normativ-huquqiy hujjatlar loyihalari muhokamasi portaliga joylashtirilgan Vazirlar Mahkamasi qarorida aytib o‘tilgan.
Portalga 4-oktabr kuni Toshkent shahrida zamonaviy gul bog‘ini tashkil etish yuzasidan Vazirlar Mahkamasi qarori loyihasi muhokamaga qo‘yilgan.
Unda aytilishicha, Toshkent shahari Yunusobod tumanidagi 6 gektar yer maydonida joylashgan sobiq Astronomiya parki o‘rnida zamonaviy gul bog‘i quriladi.
Bog‘ini barpo etish loyihasi ochiq tanlovda aniqlanadi. Tanlov g‘olibiga hududda bog‘ini barpo etish va saqlash majburiyati bilan 30 yilga ijaraga beriladi. Ijara muddati tugaganidan so‘ng bog‘ davlatga o‘tadi.
Qurilish va obodonlashtirish ishlari tanlov g‘olibining o‘z va jalb qilingan mablag‘lari hisobidan 2023-yilning II choragida tugallanishi rejalashtirilmoqda.
Hudud Toshkent shahar hokimligi tomonidan xatlovdan o‘tkaziladi. Bunda xususiy mulklar mavjud bo‘lgan taqdirda, ularning egasi bilan kelishib, kompensatsiya berish ko‘zda tutilgan.
Muhokama 19-oktabr kuni tugaydi.
Izoh (0)