Ўзбекистон ва Венгрия инвесторлари иштирокида қўшма авиаташувчи компанияни яратилиши мумкин. Бу ҳақда бош вазир ўринбосари — инвестициялар ва ташқи савдо вазири Жамшид Хўжаев ва Венгрия иқтисодий ривожланиш вазири Мартон Наджи иштирокида бўлиб ўтган музокараларда маълум бўлди.
Вазирлик матбуот хизматининг маълум қилишича, 17 октябрь куни видеоконференцалоқа тарзида ўтган музокараларда томонлар амалдаги келишувларни ҳаётга татбиқ этишнинг амалий жиҳатларини муҳокама қилди. Ўзбекистон ва Венгрия ўртасида умумий қиймати 1,2 миллиард долларлик 42 та ҳужжатни жадал ижро этиш бўйича чора-тадбирларни таҳлил қилиш ва ишлаб чиқишга алоҳида эътибор қаратди.
Қишлоқ хўжалиги, автомобилсозлик, фармацевтика, банк-молия, транспорт ва логистика соҳаларида, шунингдек, сув хўжалиги жараёнларини рақамлаштириш соҳасида қўшма инвестициявий лойиҳаларни амалга ошириш борасида ҳамкорлик қилиш истиқболлари кўриб чиқилди.
Хусусан, Венгриянинг Bona Farm, Master Good ва Kite компаниялари вакилларининг паррандачилик кластерларини ташкил этиш, интенсив боғдорчилик ва мева-сабзавотларни қайта ишлаш, RABA ва Joison Safety Systemс компаниялари ходимларининг автомобилсозлик саноати учун бутловчи қисмларни етказиб беришни ташкил этиш, Meditop, Femfelgozzo, Gideon Rixter компаниялари инновацион дори воситалари, тиббий мебеллар ва тиббий асбоб-ускуналар ишлаб чиқариш учун юқори технологияли фармацевтика корхоналарини яратиш каби лойиҳаларини батафсил ўрганиш мақсадида ташрифларини ташкил этиш бўйича келишувга эришилди.
Банк-молия соҳасидаги ҳамкорлик истиқболларини муҳокама қилиб, томонлар Ўзбекистон—Венгрия қўшма инвестиция жамғармасини яратиш имкониятларини кўриб чиқди, шунингдек, OTP Group билан лойиҳани амалга оширишни фаоллаштиришга келишиб олди.
Транспорт-логистика соҳасида икки томонлама ҳамкорликнинг жиҳатлари алоҳида кўриб чиқилди. Томонлар Wiz Air авиакомпанияси билан Самарқанд—Абу-Даби тўғридан-тўғри рейслари муваффақиятли йўлга қўйилганини олқишлади ва ўзбекистонлик инвесторлар иштирокида қўшма авиаташувчи компанияни яратиш масаласини муҳокама қилди. Ҳаво қатнови тўғрисидаги ҳукуматлараро битимни имзолашни тезлаштиришга келишилди.
Музокаралар якунлари бўйича томонлар ҳамкорликнинг муҳокама қилинган йўналишларини амалга ошириш мақсадида «йўл хариталари» ва дастурларини бажариш бўйича қўшма ишларни давом эттириш ва аниқ амалий чоралар кўришга содиқлигини билдирди.
Изоҳ (0)